Таван жил үргэлжилсэн энэ зарга эцэслэн шийдэгдэж Хаанбанк дээрхи мөнгийг хохирогч иргэнд төлөхөөр болжээ. Өмнө нь энэ банк шүүхийнхэнд орон сууцны бага хүүтэй зээл өгсөн шуугианаас болоод хэрэг нөгөө талд шийдэгдэх болгоомжлол айдас байсан. Тухайн үед иргэн Б.Б нь эрүүгийн хэрэгт холбогдон шалгагдаж түүний Хаан банкин дахь төгрөгийн болон ам.долларын дансыг битүүмжлээд байжээ. Шалгалтын явцад иргэн нь нас барсан тул түүнд холбогдох эрүүгийн хэргийг хэрэгсэхгүй болгосон ч данс битүүмжилсэн тогтоолыг хэвээр үлдээсэн аж. Тухайн үед талийгаачийн дансанд 1,4 тэрбум төгрөг, 310 мянган доллар байжээ. Гэхдээ энэ нь мөнгө зээлдүүлэгч иргэн Р.Б-гийх гэнэ. Талийгаач нь түүнээс бэлнээр 1,4 сая доллар зээлсэн агаад төлбөртөө дансандаа байгаа төгрөг болон долларыг өгнө хэмээн амлаж байжээ. Гэтэл зээлдэгч нас барсан агаад өв залгалмжлалын асуудал босож ирсэн. Бурхан болоочийн хүүхдүүд эцгийнхээ өвөөс татгалзсан тул эхнэр Энхтуяа нь дансыг эзэмшихээр хөөцөлдөж эхэлсэн байна. Хэдийгээр талийгаачид холбогдох эрүүгийн хэргийг хэрэгсэхгүй болгож шийдвэрлэсэн прокурорын тогтоолд “өмчлөлийн асуудал шийдвэрлэтэл хоригийг хэвээр үлдээх” талаар тодорхой дурдсан атал Чингэлтэй дүүргийн 204-р тойргийн нотариатч Б.Г нь өмчлөх эрхийн гэрчилгээ олгожээ. Нэгэнт өмчлөх эрхийн гэрчилгээтэй болсон бэлэвсэн эхнэр нь талийгаачийн дансыг эзэмшихээр Хаанбанкны хуулийн хэлтэст ханджээ. Тухайн үед дарга Хосбаяр нь амралттай байсан тул ахлах хуулийн зөвлөх Тэмүүлэл асуудлыг шийдвэрлэхээр болжээ. “Өвлөгч” нь өвлөх эрхийн гэрчилгээ, прокурорын хэрэг хэрэгсэхгүй болгосон тогтоолын хуулбар зэргийг ахлах зөвлөхөд үзүүлжээ. Энэ хэргийн нэг сонирхолтой зүйл нь “өвлөгч” прокурорын тогтоолын хуулбарыг олж авч “чадсан” агаад харин яаж авсан нь тогтоогдоогүй. Бас нэг гайхалтай зүйл нь данс өвлөх эрхийг хуулийн хэлтэст хянаж байхад “өвлөгч” нь гүйлгээ хийхээр Хаанбанкны “Тэнгис” салбарт ирээд байсан. Салбарын ахлах теллер нь дугаар бүхий данснуудын барилтыг тавьсан эсэх талаар дээшээ лавлажээ. Банкныхан данс битүүмжлэхийг “данс барилт”, битүүмжлэл цуцлахыг “данс тавилт” хэмээн эротик нэрлэдэг аж. Өвлөгч гүйлгээ хийхээр ирснээс хойш ердөө 10-20-хон минутын дараа хуулийн хэлтсийн туслах ажилтан Мөнхчимэгээс "Сайн байна уу, хавсаргасан мэдэгдлийн дагуу дансны барилтыг чөлөөлж, хариу ирүүлнэ үү? асуух зүйл байвал тодруулна уу?" гэсэн имейл иржээ. Тэрээр хуулийн ахлах зөвлөхийнхээ тушаалаар ажиллажээ. Ийнхүү 1,4 тэрбум төгрөгтэй төгрөгийн, 300 мянган доллартай долларын данс битүүмжлэлээс гарчээ. Гүйлгээ хийх эрхтэй болмогц “өвлөгч” нь талийгаачийн хоёр дансан дахь бүх мөнгийг өөрийн нэр дээр шинээр нээлгэсэн төгрөгийн болон долларын данс руу шилжүүлжээ. Дараа нь 1,4 тэрбум төгрөгөө 671 мянган доллар болгон долларын данс руу шилжүүлсэн. Ингээд нийт 935 мянган доллароо Америкийн Сан-Франциско хотын “Ведс Фарго” банкны Цэрэнбаатар Баясгалан гэдэг хүний данс рүү “уул уурхайн тоног төхөөрөмж” хэмээн шилжүүлсэн байна. Үүнээс сарын дараа Хаанбанкны “Комплейнс” буюу асуудал шийдвэрлэх газраас “Тэнгис” салбар руу утасдаж Америк руу шилжүүлэг хийсэн “өвлөгч”-ийн тухай мэдээлэл шаарджээ. Салбарынхан Энхтуяагийн утас руу залгасан ч холбогдох боломжгүй болжээ. Хаягаар гэрт нь очиход хөршүүд нь “аль хэдийн нүүсэн” гэсэн байна. Одоо тэрээр Америк байх магадлалтай гэнэ. Битүүмжлэгдсэн данснаас гүйлгээ хийгдэж бүх мөнгө хил даваад явсныг мэдсэн хохирогч Хаан банкийг хуулийн байгууллагад өгчээ. Саяхан шийдвэр гарч банкнаас хоёр тэрбум гаруй төгрөг гаргаж хохирогчид өгөхөөр болсон байна.
