Нийслэлийн иргэдийн Төлөөлөгчдийн Хурал дахь Монгол Ардын Намын бүлгийн ээлжит хуралдаан өнөөдөр /2026.11.12/ болж, нийслэлийн 2026 оны төсөвт нэмэлт, өөрчлөлт оруулах тухай асуудлын хоёрдугаар хэлэлцүүлгийг хийж, бүлгийн гишүүдийн олонхийн саналаар дэмжлээ. Мөн төсвийн тодотголтой хамт өргөн мэдүүлсэн дотоод үнэт цаас гаргах, төсвийн сахилга бат, санхүүгийн хариуцлагыг сайжруулах асуудлыг НИТХ-ын ээлжит IX хуралдаанд шилжүүлэхээр боллоо.

Төсвийн тодотголын хүрээнд НИТХ-ын хороодын хуралдаанаас гаргасан санал, дүгнэлт болон тусгагдсан ажлуудын талаар Нийслэлийн Засаг даргын эдийн засгийн хөгжил, дэд бүтцийн асуудал хариуцсан нэгдүгээр орлогч Б.Мөнхбат мэдээлэл өглөө. Төсвийн тодотголыг боловсруулахдаа энэ онд багтаан дуусгах боломжтой хөрөнгө оруулалтын ажлыг эрчимжүүлэх, өмнөх онуудад санхүүжилт нь хойшилсон төслийг үргэлжлүүлэх, өвөлжилтийн бэлтгэлийг хангах зэрэг үндсэн чиглэл баримталсныг онцоллоо. Тухайлбал, Өргөө амаржих газрын барилгын их засварын ажлыг нэмэлт санхүүжилтээр бүрэн дуусгах, дүүжин тээврийн хоёр зогсоолын гадна тохижилтын ажлыг гүйцээх, зарим ерөнхий боловсролын сургуулийн өргөтгөлийн гадна тохижилтын ажлыг дуусган ашиглалтад оруулах зэрэг ажлыг тусгажээ. Түүнчлэн Баянгол, Сонгинохайрхан дүүргийн Туул гол дагуух барилгын хог хаягдлыг цэвэрлэх ажил багтжээ.

Хуралдааны үеэр төлөөлөгчид дүүргүүдэд хэрэгжиж буй авто зам, нийтийн тээвэр, инженерийн дэд бүтцийн ажлын санхүүжилт, хэрэгжилттэй холбоотой санал, хүсэлтээ илэрхийллээ. Тухайлбал, төлөөлөгч Д.Наянбаяр Налайх дүүрэгт хэрэгжиж буй авто замын засвар, шинэчлэлийн ажлын явц болон дутуу үлдсэн ажлуудыг төсвийн тодотголын хүрээнд үргэлжлүүлэн хэрэгжүүлэх боломжийн талаар тодруулав. Мөн тус дүүргийн нийтийн тээврийн чиглэлийг нэмэгдүүлэх, үйлчилгээний хүртээмж, цагийн хуваарийг сайжруулах, Дүнжингарав чиглэлд шууд зорчих боломжийг судлах шаардлагатайг хэллээ. Түүнчлэн нийтийн тээврийн үйлчилгээний зардал, түлшний үнийн өсөлттэй холбоотойгоор цаашид баримтлах бодлогыг тодруулах санал гаргасан юм.

Төлөөлөгч Ү.Оюунзул Баянзүрх дүүргийн 24 дүгээр хороонд байрлах бохир усны дундын шугамын асуудлыг хөндлөө. Тус шугамаар найман байгууллагын бохир ус дамждаг бөгөөд ашиглалтын хугацаа уртасч, элэгдэл үүссэний улмаас бохир ус хальж байгаа нь иргэдийн эрүүл, аюулгүй орчинд амьдрах нөхцөлд хүндрэл учруулж байгааг дурдав. Иймд уг шугамыг шинэчлэх ажлыг төсвийн тодотголд тусгах боломжийг судлах шаардлагатайг хэлэв.

Мөн хуралдаанаар Кибер аюулгүй байдлын хороо байгуулах тухай тогтоолд нэмэлт, өөрчлөлт оруулах болон төрийн дээд шагналд тодорхойлж уламжлах тухай асуудлыг хэлэлцэн дэмжлээ.