
УИХ дахь МАН-ын бүлэг өнөөдрийн /2026.11.16/ ээлжит хуралдаанаараа дотоод асуудлаа ярьж байгаа тул мэдээлэл хийхгүй аж.
УИХ дахь МАН-ын бүлгийн гишүүдийн хэрүүл өнгөрсөн долоо хоногоос эхлэн ширүүссэн. Тухайлбал, УИХ-ын гишүүн Д.Амарбаясгалан Засгийн газрын хэрэг эрхлэх газрын дарга Б.Энхбаярыг албан тушаалаасаа чөлөөлөгдөн, Бодь групптэй нэр холбогдоод байгаа авлигын асуудлаа шалгуулах ёстой гэж өнгөрсөн долоо хоногт мэдэгдсэн. Ингэхдээ тэрбээр “Бортээгийн ордтой холбоотой асуудал үүсэхэд би УИХ-ын даргаасаа чөлөөлөгдөөд хуулийн байгууллагад шалгуулсан” гэж мэдэгдсэн юм.
Канад улсад түр оршин сууж байгаа Улаанбаатар хотын захирагч асан Х.Нямбаатар өнгөрсөн амралтын өдөр хийсэн Live-тай холбоотойгоор УИХ дахь МАН-ын бүлгийн гишүүд мөн байр суурь илэрхийлж байгаа. Тухайлбал, УИХ-ын дэд дарга Ж.Бат-Эрдэнэ "Бодь"-ийг нүүрсээр дэмжиж, татаас өгсөн. Энэ бол ноцтой асуудал. Нүүрсний сонсголоор яригдсан ч дарагдаад өнгөрсөн. Үүнийг шалгах ёстой, хуулийн байгууллага ажлаа хиймээр байна” гэсэн юм. Харин Х.Нямбаатарын мэдээлэлтэй холбогдуулж Засгийн газрын Хэрэг эрхлэх газрын дарга Б.Энхбаяр “Намайг нүүрсчид огцруулна гэж ярьж байгаа. Л.Оюун-Эрдэнэ, Х.Нямбаатар нар ямар ч баримтгүй гүтгэдэг. Баримт асуухаар А.Амундра тэгж ярьсан гэцгээдэг. Би Голомт банк руу орж ч үзээгүй, надад Голомтын данс ч байдаггүй. Амьдралдаа би Голомтын Д.Баясгалантай уулзаж байгаагүй” гэх байр суурь илэрхийлээд байна.
Засгийн газарт мөн сэлгээ хийхээс аргагүйд хүрсэн. Батлан хамгаалахын сайд Д.Батлут чөлөөлөгдөх хүсэлт гаргаж байгаагаа өнгөрсөн долоо хоногт мэдэгдсэн. Түүний оронд хэнийг томилох вэ гэдэг асуудал эрх баригчдын хувьд шийдэх чухал асуудал болж хувирсан. Хуулиараа хэнийг сайдаар томилох нь Ерөнхий сайдын бүрэн эрхийн асуудал боловч толгой мэдэн ийм шийдвэр гаргаж чадахгүй байгаа тухай яриа дуулдах болсон. Тиймээс эрх баригч хүчин энэ долоо хоногт Байнгын хороо, УИХ-ын чуулганаар хэлэлцэх асуудлаас илүүтэй сандал суудлын хуваарилалтдаа анхаарал хандуулахаас аргагүйд хүрлээ.
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!