“Эрдэнэс Тавантолгой” ХК 2027 онд 50 сая тонн нүүрс олборлохоор төлөвлөж буйгаа мэдээллээ. 2026 онд нийт 35 сая тонныг олборлохоор төлөвлөснөөс 29 сая тонныг нь олборлоод байна. Ирэх онд баяжуулах үйлдвэрийг 20 км төмөр замаар холбосноор тээврийн хүчин чадал нэмэгдэнэ. Үүнтэй холбоотойгоор олборлолтын төлөвлөгөөгөө нэмэгдүүлж буйг компанийн Гүйцэтгэх захирал Б.Чагнаадорж мэдээллээ. Төмөр замын зураг төслөө боловсруулсан, тендер зарлахаар бэлтгэж байна. Одоогоор баяжуулах үйлдвэрээс авто машинаар тээвэр хийж буй тул хүчин чадал дутагдалтай байгаа аж. Үүнээс шалтгаалан баяжуулах үйлдвэрт 700 мянган тонн, уурхайд долоон сая тонн нүүрсний үлдэгдэлтэй байгааг Ерөнхий сайдад танилцуулжээ. Мөн Бортээг болон Ончхараа, Бортолгой хэсэг рүү тус бүр 14-27 км төмөр зам барихаар төлөвлөж байна. Одоогоор нүүрс баяжуулах өртөг 50 ам.доллар орчим байгаа бол баяжуулсны дараа нүүрсний үнэ анх дуудаж буй үнээс багадаа 20 ам.доллароор өсөж буйг мэдээллээ