Богдхан уулын хамгаалалтын бүсийг 22896 га байсныг тэлж 5562 га газраар нэмэгдүүлэн 28458 га болгон өргөтгөж, нэмж хамгаалалтанд авах шийдвэрийг Байгаль орчин, аялал жуулчлалын яамнаас гаргасан билээ.
Гэвч энэ шийдвэрийн хажуугаар өнгөрсөн амралтын өдрүүдэд Хан-Уул дүүргийн 4-р хорооны нутаг дэвсгэрт байрлах Хүүшийн ам нь Богдхан уулын дархан цаазат газрын хамгаалалтын бүсэд хамаардаг бөгөөд Тусгай хамгаалалтын газрын ногоон байгууламжтай хэсэгт хашаа татаж, орон сууцны хороолол барих гэж байгаа талаар мэдээлэл гарсан билээ.
Хамгийн ноцтой нь, тухайн газрыг "Тэүхэ" ХХК нь "Аялал жуучлалын цогцолбор байгуулна" гэх нэрээр төсөл хэрэгжүүлэхээр авсан аж. Гэтэл ашиглалтын зориулалтаа өөрчлөөд олон давхар орон сууцны хороолол барихаар ийнхүү хашаа татаж, ажлаа эхлүүлэхээр болсон талаар бид өмнө мэдээлж байсан.
Тэгвэл Хүүшийн аманд барилга барих зөвшөөрлийг "Аялал жуучлалын цогцолбор байгуулна" гэх нэрээр Байгаль орчин, аялал жуулчлалын яам олгожээ.
Үүнийг тус хорооны оршин суугчид эсэргүүцэж, энэ сарын 16-ний өдөр тус ногоон бүсийг хэвээр нь байлгах, эсхүл сургууль, цэцэрлэг, олон нийтийн амралтын цэцэрлэгт хүрээлэн болгох шаардлагыг Хотын дарга Д.Сумъяабазар "Иргэд, олон нийттэй харилцах 11-11" төвд ажиллах үеэр өгсөн байна.
Харин хүсэлт гаргасан иргэдийн шаардлагын хариуг өнөөдөр Хот байгуулалт, хөгжлийн газраас ирүүлсэн бөгөөд тус хариут "Хүүшийн амын зөвшөөрлийг БОАЖЯ олгосон байна. Та бүхэнд БОАЖЯ-нд хандана уу" гэжээ.
