Оросын зэвсэгт хүчин Украины нутаг дэвсгэрт халдсаны дараахан хэсэг эмэгтэйчүүд армидаа санхүүжилт олохын тулд нүцгэн зургаа зарах онлайн платформ ажиллуулж эхэлжээ.

Сайтыг санаачлагч нь 23 настай Настасья Наско юм байна. Тэрбээр дайны өмнө Киев хотод амьдардаг байгаад сүүлд дүрвэж Польшийн нийслэл Варшавт амьдрах болжээ. Энд ирээд тэр Киевт амьдардаг Анастасия Кучменкотой хамтран “TerOnlyFans” сайтыг нээсэн байна.

Сайтын нэрийн Ter нь “территори” буюу “газар нутаг” гэсэн утгатай, ажиллах зарчим нь “OnlyFans” сайт дээр тулгуурлажээ.

“OnlyFans” бол насанд хүрэгчдэд зориулсан контент бүтээгчид төлбөртэй дагагчдаасаа мөнгө олдог дэлхийн хэмжээний платформ юм.

“TerOnlyFans” сайт өнгөрсөн гурван сарын хугацаанд $700,000-ыг цуглуулж, ихэнхийг нь Украины армид хандивлажээ.

Бас багахан хэсгийг нь Украины дүрвэгчдэд туслах санд хандивласан байна. Сайтад одоогоор 35 эмэгтэй, гурван эрэгтэй ажиллаж байгаагийн ихэнх нь Украинд амьдардаг гэнэ.

Тэдгээрийн 10 нь л дайнаас өмнө “OnlyFans” платформд ажиллаж байсан туршлагатай бол бусад нь анх удаа ийм хөдөлгөөнд нэгдсэн сайн дурынхан юм байна.

Сайтаар үйлчлүүлэгчдийн ихэнх нь украинчууд бол бас Нидерланд, Франц, Их Британийн үйлчлүүлэгчид байдаг гэнэ.

Тэдгээрээс хамгийн их мөнгө төлсөн тохиолдол нь $2,800-тай тэнцэх криптовалют байжээ.

“Бид биеэ үнэлэгчид биш, зөвхөн эх орноо хамгаалах дайнд зориулсан хандив босгогчид” гэж Наско хэвлэлд ярьсан байна.

Тэрбээр “Бид энэ төслөө Путинийг үхэх хүртэл, эсвэл Оросын түрэмгийлэл зогсох хүртэл үргэлжлүүлэх болно” гэж хэлжээ.

Эх сурвалж: Business Insider