Нийгмийн амьдрал өдрөөс өдөрт уруудаж байна. Өргөн хэрэглээний бараа бүтээгдэхүүний үнэ тэнгэрт тулж, монгол төгрөг цаас шиг боллоо. Валютын ханш 3500 төгрөгт шүргэж, цалингийн хэмжээ байрандаа байсаар байна. Үүнийг шийдвэрлэх Төр засаг гэж алга. Ердөө чадамжгүй Төр ажиллаж байгааг анхнаасаа харуулсан. Одоо шийдвэрлэх ямар ч арга алга. Учир нь Монголын Төр гурван Ерөнхий сайдтай ажиллаж байна. Өөрөөр хэлбэл гурван толгойтой Гүйцэтгэх засаглал шийдвэрээ гаргаж чадахгүй сууна.

Тухайлбал, эрх баригчдаас санал оруулж, “Утсан хүүхэлдэй” болгосон Л.Оюун-Эрдэнэ хэмээх албан ёсны боловч эрх мэдэлгүй Ерөнхий сайд тамга барьж байгаа бол Ерөнхийлөгч У.Хүрэлсүх хэмээх нөхөр дээрээс үүрэг өгдөг албан бус нэг Ерөнхий сайд түүний гарыг барьж тамга даруулж байна. Харин гурав дахь нь Засгийн газрын хэрэг эрхлэх газрын дарга Д.Амарбаясгалан гэх албан бус Ерөнхий сайд тамгыг нь өөр газар дарчих вий хэмээн гарыг нь түшин чиглүүлж сууна. Өнөөдрийн Засгийн газарт Л.Оюун-Эрдэнийн томилгооны гэх гуравхан сайд байгааг дуулгасан. Үүнээс хоёр нь УИХ-ын дарга Г.Занданшатарынх, үлдсэн нь буюу Засгийн газрын 80 шахам хувь нь албан бус Ерөнхий сайд У.Хүрэлсүх, Д.Амарбаясгалан нарынх гэдгийг эх сурвалж хэлдэг.

Уг нь айл гэрт нэг л эзэн байдаг, улс орныг нэг л хаан удирдаж ирсэн түүхтэй. Айл гэрт өөр нэг эзэн ирвэл тус гэр бүл салж сарнихаас эхлээд амьдрал нь дампуурдаг. Эзэнтэй улс оронд өөр нэг хаан эзэн суухаар ирвэл дайн дажин өрнөж, улмаар аль нэг улс нь ялагдал хүлээж, маш их эрсдэл үүрдэг. Олон ч хүний амиар хэмжигдэх энэ дайн эртнээсээ байсан. Харин өнөөдөр манай улсад шинэ маягаар өрнөж байгааг бид харж байна. Тэгэхээр Л.Оюун-Эрдэнэ сайдаа Засгийн газрын эзэн юм бол эзэн хүн шиг байж улс орноо өөд нь татаач ээ. Гурвын гурван Ерөнхий сайдтай Монгол Улс яаж өөдлөх юм бэ.

Tumen.mn