Энэ мэдээ хуучирсан буюу 2023/01/26-нд нийтлэгдсэн мэдээ болно.

Д.Амарбаясгалан: УИХ-аас баталсан хуульд хүүхдийн мөнгийг 91 хувьд олгоно гэснийг баримтлахаас өөр аргагүй

Хүүхдийн мөнгө олгох өрхийг тодорхойлох, мэдээлэл шинэчлэх ажлын явцыг Засгийн Газрын Хэрэг Эрхлэх Газар(ЗГХЭГ)-ын дарга Д.Амарбаясгалан танилцуулав.

Тэрбээр "Нийт хүүхдийн 87 хувьд мөнгийг нь олгоод байна. Нэгдүгээр сардаа багтааж 91 хувьд хүргэнэ.

Хүүхдийн мөнгө олгож эхэлсэнтэй холбоотойгоор өнгөрсөн 10 хоногт иргэд мэдээллээ эрчимтэй шинэчилж байна. Тухайлбал,

  • 90 гаруй мянган өрх мэдээллээ шинэчлэх хүсэлтээ ирүүлсэн
  • 11 мянга орчим айл өрх шинээр бүртгэгдсэн
  • Өмнө нь бүртгэлтэй байсан 5,000 орчим өрх хасагдсан байна.

Мөн өнөөдрийн байдлаар 100 мянга орчим машин бүртгэлээс хасагдах нөхцөл үүссэн. Учир нь таван жил татвараа төлөөгүй, хөдөлгөөнд оролцдоггүй хэсгүүд бий. Иргэд авто машинаа борлуулахдаа янз бүрийн аргаар зардаг. Жишээлбэл, эд ангиар задлаад борлуулдаг нь бүртгэлээс хасагддаггүй" гэлээ.

Түүнчлэн тэрбээр сэтгүүлчдийн асуултад хариулав.

-Хүүхдийн мөнгийг олгохдоо 91 хувиа барих уу. Мэдээллээ шинэчлээд эхлэхээр нэмэгдэж магадгүй юм биш үү?

-УИХ-аас батлагдсан хууль 91 хувь гэж гарсан тул Засгийн газар 91 хувиа барихаас өөр аргагүй. Зөрчвөл Үндсэн хуулийн зөрчил болох асуудалтай.

Иргэд мэдээллээ шинэчилж байгаатай холбоотойгоор нааш, цааш хөдлөх тохиолдол гарна. Гэхдээ бидний авч буй мэдээллээр хүүхдийн мөнгө авах хүүхдүүдийн 1-1.5 хувь нь хөдлөх нөхцөл үүсэж магадгүй гэж үзэж байгаа.

-Аргачлалыг эргэж харах боломжтой юу?

-Орлого орлуулан тооцох аргачлалаар тооцно гэдгээ УИХ-д танилцуулж, УИХ-аас хууль болон батлагдахдаа өрхийн амьжиргааны түвшинд үндэслэж олгоно гэдэг шийдвэр гарсан. Энэ дагуу Засгийн газраас журам баталсан.

Анх удаа хийгдэж байгаа учраас зарим тохиолдолд бага зэрэг алдаа гарч байна. Мөн иргэд бүртгэлийн шинэчлэлээ тогтмол хийлгэдэггүй асуудал ч байна. Эхнэр, нөхөр хоёр хаяг дээр бүртгэлтэй байгаад хүүхдүүд нь хуваагдаж бүртгэгдсэн байх жишээтэй гээд асуудал нэлээд гарч байгаа.

-Хэдэн хувьд нь мэдээллийн зөрчил байгаа вэ?

-Зургаан хувьд асуудал байна. Нэгдүгээр сард багтаан энэ зургаан хувиас дөрвөн хувь нь шигшигдэж, 91 хувийг гүйцээн, мөнгийг нь олгоно. Цаашид 1-1.5 хувь нь хөдлөх магадлалтай. Мэдээлэл шинэчлэл хурдтай хийгдэж байна. 10 хоногт нийт өрхийн 10 хувь нь мэдээллээ шинэчлэхээр хүсэлтээ өгсөн. Энэ нь нийт өрхийн 10 хувьд хөдөлгөөн орно гэсэн үг.

-Сангийн сайд Цагаан сарын өмнө хүүхдийн мөнгийг урьдчилж өгнө гэж байсан?

-Сангийн сайдаас тодруулаарай.

АИ-92 бензиний гаалийн татварыг энэ сарын 30-аас тэглэнэ
АИ-92 бензиний гаалийн татварыг энэ сарын 30-аас тэглэнэ
 
Путин: F-16 онгоцтой баазууд руу нь довтолно
Путин: F-16 онгоцтой баазууд руу нь довтолно
Энэ мэдээ хуучирсан буюу 2023/01/26-нд нийтлэгдсэн мэдээ болно.