УИХ-ын гишүүний бүрэн эрх, Хөдөлмөр, нийгмийн хамгааллын сайдын суудал, Чингэлтэй дүүргийн МАН-ын хорооны даргын суудлаас тус тус түдгэлзээд буй Т.Аюурсайхан нүүрсний хулгайтай холбогдож, яллагдагчаар татагдаад байгаа. Түүнийг хамаарал бүхий хүмүүстээ давуу байдал олгосон, нүүрсний хулгайд буруутай байж болзошгүй шалтгаанаар Авлигатай тэмцэх газар яллагдагчаар татан шалгах саналтайгаар прокурорт хүргүүлсэн. Эх сурвалжийн дурдаж байгаагаас харвал АТГ-ын тогтоолд Т.Аюурсайханыг “Эрдэнэс Тавантолгой” компаниас нүүрсний квот, тендер авах, хулгайн мөнгөө өөрийн шадар туслахуудаар угаах ажил хийлгэдэг байсан учир Авлигатай тэмцэх газраас яллагдагчаар татаж байгаа аж. Яллагдагчаар татах тогтоолтой Хөдөлмөр, нийгмийн хамгааллын сайд танилцаж, гарын үсэг зурсан байна.
Үүнтэй холбогдуулан түүний хамаарал бүхий нөхдийг шалгахыг нь шалгаж баривчлахыг баривчлаад байгаа. Харин баттай гэж болох эх сурвалжийн хэлж байгаагаас харахад Т.Аюурсайханы хамаарал бүхий хүмүүсийг шалгаж байгаа бол тэргүүн эгнээнд Чингэлтэй дүүргийн Засаг дарга Н.Батсүмбэрэл байх ёстойг дурдаж байна. Тэрбээр Оюутны холбоо гэж байхаас Т.Аюурсайхантай хамтран ажиллаж байсан төдийгүй удаа дараагийн дэмжлэг авч өнөөдрийн албан тушаалд ирсэн байж болзошгүйг дурдсан. Энэ нь хэдийгээр хардлага байж болох ч анзаарч хармаар зүйл олон бий.
Т.Аюурсайхан, Н.Батсүмбэрэл хоёрын улс төрд замнасан замнал яг адилхан байгаа нь анхаарал татна. Т.Аюурсайхан бизнесийн байгууллагаас гараагаа эхлүүлж, 2008 он гэхэд Чингэлтэй дүүргийн Иргэдийн төлөөлөгчдийн хурлын төлөөлөгч болчихсон байв. Тэгвэл 2009 оноос МАН-ын Удирдах зөвлөлийн Хэрэг эрхлэх газарт Улс төрийн ажилтан, Ерөнхий нарийн бичгийн даргын зөвлөхөөр ажилласан нь ч ажлын дөр суулгах газар биш. Ёстой л өнөөх “Шинэчлэлийн хороо” гэх шантаажны байгууллага нь энд бүрэлдэж бойжсон байх. Гэтэл Чингэлтэй дүүрэгт багагүй үймээн дэгдэж, энэ дуулиан дундуур тус дүүргийн Засаг даргаар хэдхэн сар ажиллаад үзсэн. Мэдээж хэрэг, тэр дүүрэг авч явах хэмжээнд хүрээгүй учраас 2012 оноос МАН-ын Шинэчлэл, хөгжлийн хорооны даргаар ажилласан. Ах нар арга ядахдаа л нэг албаны нэр зүүлгээд дэргэдээ байлгасан болохоос бус тэнд тийм ч хэрэгтэй дүр байгаагүй л болов уу. Харин 2013 онд МАН-ын Хяналтын Ерөнхий Хорооны дэд даргаар дамжуулан, 2015 онд Засгийн газрын тохируулагч агентлаг Шударга өрсөлдөөн, хэрэглэгчийн төлөө газрын даргаар хэдэн сар ажилласан ийм л намтартай хүн. Түүний намтраас харахад улс төрд өөрийнхөө албан имижийг бүрдүүлэх гэж үнэхээр ядсан бөгөөд яагаад ч ажлын хүн биш гэдгийг бэлхэн харж болно. Засаг даргаар болон агентлагийн даргаар хэдхэн сар тус тус ажилласан ийм л улс төрийн талбар дахь нэг тоглоомын дүр байсан байх. Энэ л утгаараа 2016 оны УИХ-ын сонгуульд нэр дэвшин ялалт байгуулсан.
Тэгвэл Н.Батсүмбэрэл нь 2006 онд нийслэлийн МАН-ын хороонд улс төрийн ажилтнаар ажлынхаа гарааг эхлүүлж, 2007 онд Ерөнхийлөгчийн тамгын газарт референт, 2007-2010 онд нийслэлийн МАН-ын хороонд улс төрийн ажилтан, 2011-2012 онд НАМОХ-ны Ерөнхий нарийн бичгийн дарга, 2011-2012 онд МҮХАҮТ-д хэлтсийн дарга, мөн онд МАН-ын Ерөнхий нарийн бичгийн даргын зөвлөх, 2012-2013 онд Чингэлтэй дүүргийн Засаг даргын орлогч, 2013-2016 онд МАН-ын Улс төрийн бодлогын ахлах ажилтан, 2016 онд Монгол наадам цогцолбор ОНӨТҮГ-ын дарга, 2008-2012 онд Чингэлтэй дүүргийн Иргэдийн төлөөлөгчдийн хурлын төлөөлөгч тэргүүлэгч, 2016 оноос Нийслэлийн иргэдийн төлөөлөгчдийн хурлын төлөөлөгч, 2020 оноос дүүргийн Засаг даргаар тус тус ажиллаж байгаа гэхээр Т.Аюурсайхантай улс төрийн замнал тун адилхан.
Т.Аюурсайхан “Эрдэнэс Тавантолгой” компаниас нүүрсний квот, тендер авах, хулгайн мөнгөө өөрийн шадар туслахуудаар угаах ажил хийлгэдэг байсан байж болзошгүй” гэх үндэслэлээр шалгаж байгаа. Тиймдээ ч түүний хамаарал бүхий хүмүүсийг эртнээс шалгаж эхэлсэн. Гэтэл хамгийн ойрын хүн Засаг дарга Н.Батсүмбэрэлийг шалгахгүй байгаа нь хардлага дагуулсан хэрэг. Тэгээд ч улс төрд санаархаж яваа өөрийн гэх хураасан хөрөнгө зоорьгүй, бизнесгүй залуу дарга энэ их мөнгөний дэргэдүүр нүдээ аниад өнгөрнө гэж үгүй л болов уу.
Tumen.mn
