УИХ-ын гишүүн асан Н.Номтойбаяр Ногоон намыг авч, МҮАН-тай нэгтгээд “Үндэсний эвсэл” байгуулчихлаа. Гуравдагчдын орон зайд анхдагчдын нэг Ногоон нам Сонгуулийн нэрсийн жагсаалтад гуравдугаарт эрэмбэлэгддэг. Мэдэх мэдэхгүй олон нам өрсөлдөх, томсгосон тойрогт нэрсийн жагсаалтад эрэмбэ эдлэнэ гэдэг давуу тал болно.

Тэрбээр “МАН-ын дарга Л.Оюун-Эрдэнийн өрсөлдөх тойрогт очиж нэр дэвшинэ” хэмээн наанаа цээж дэлдэж байгаа ч цаанаа дүрэм зохиогчидтой ямар нэгэн байдлаар тохирсон байж таарна. Угшил нэгтнүүд ямар нэгэн байдлаар учраа олж л таарна. Н.Номтойбаяр “Үндэсний баатар”-аар өргөмжлүүлэх хэмжээнд пиар хийж байгаа нь өөртөө бусдыг татах гэсэн бодлого явуулж, илүүрхэх оролдлого хийж байна.

Н.Номтойбаяр зөвхөн хүрээнд суугаад байхыг бодсонгүй. Орон нутгийн иргэд, сонгогчидтой хийх уулзалтаа Дорнод аймгаас эхэлжээ. Ийн явах үеэрээ тэр "Би нэр дэвшихгүй, мөн нэр дэвшинэ. Энэ ямар утгатай вэ гэхээр 2024 оны сонгуулийн тогтолцоо хоёр тогтолцооны нийлбэр байдлаар хууль нь батлагдсан. Өөрөөр хэлбэл, мажоритар гэхээрээ өмнөх 2012, 2016 оны байдлаар явж байсантай адилхан тойргоос хүмүүс нэр дэвшдэг. Мажоритар тойрог дээр би нэр дэвшихгүй. Өөрөөр хэлбэл, би Дорнодоос нэр дэвшихгүй. Анхнаасаа үүнийг тодорхой болгож, хэлээд явсан дээр байх. Харин пропорцианаль буюу улсын хэмжээнд нэр дэвшдэг. Тэр хэмжээнд би нэр дэвшинэ. Өөрөөр хэлбэл, хэрвээ манай Дорнодынхон намайг дэмжиж байвал манай эвсэлд саналаа өгч болно. Баян-Өлгий аймаг, казахууд намайг дэмжиж байгаа бол эвсэлд саналаа өгнө гэсэн үг" гэсэн юм. Энэ нь Н.Номтойбаяр нэр дэвшиж өрсөлдөхгүй намын жагсаалтад эрэмбэ эдлэнэ гэсэн үг. Тодотгож хэлбэл тэрбээр Н.Энхбаярын тактикыг хэрэглэж байна.

Ер нь бол Н.Номтойбаярт маш том боломж харагдаж байна. Санхүүгийн боломжоо бүрдүүлээд жижгүүдийг “Үндэсний эвсэл”-д нэтгэж чадвал хоёр том намын саналыг самарч таарна. Өнгөрөгч 2011 онд Сонгуулийн тухай хуульд өөрчлөлт орж, холимог тогтолцоонд шилжүүлсэн. Үүний зэрэгцээ одоогийн МАН МАХН нэрээ сольж, МАН-д гомдсон Н.Энхбаяр голж орхисон нэрийг нь авч улс төр хийсэн. Д.Тэрбишдагва, Ч.Улаанаас эхлээд дархан нэг суудалтай нөхдүүд МАН-д гомдож, Н.Энхбаярыг дагаж байсан даа. Тухайн сонгуульд МАН ялагдал хүлээж, Н.Энхбаяр. М.Энхсайхан нарын үүсгэсэн “Шударга ёс” эвсэл 10 гаруй суудалтай УИХ-д орж ирсэн түүхийг ч санах хэрэгтэй. Засгийн газарт хүртэл хамтарч байв даа. Тэр энэ тактикаар улс төрд эргэн ирж байна.

Tumen.mn