Өнгөрсөн долоо хоногт манай сурвалжлах баг Дундговь аймагт ажиллаад ирлээ. Дундговь аймагт өнөөдрийн байдлаар 15 сумаас 5 сум төмөр зудын нөхцөл байдалтай, бусад сумд цагаан зудтай байна. Өвөлжилт, хаваржилт хүндэрч байгаатай холбогдуулан Эрдэнэс Монгол компанийн захирал С.Наранцогтын санаачилгаар “Хатуу өвлийн зудыг халуун сэтгэлийн дэмээр хамтдаа даван туулъя” аяныг зохион байгуулж байна. Энэ хүрээнд 1,000 боодол тэжээл, 1,000 боодол өвс, 2 тонн шатахуун, 100 хос гутал, 3,000ш бээлий, 6,000ш амны хаалт, 50ш малгай зэрэг хэрэгцээт зүйлсийг Дундговь аймгийн удирдлагуудад хүлээлгэн өглөө.
Ч.Болдбаатар “Эрдэнэс Алт Ресурс” ХХК-ийн Салхит уулын баяжуулах үйлдвэрийн захирал:
"Эрдэнэс Алт Ресурс ХХК-ийн төлөөлөл болж бид Дундговь аймагт ирсэн байна. Эрдэнэс Монгол ХК-ийн гүйцэтгэх захирал С.Наранцогт, Эрдэнэс Алт Ресурс ХХК-ийн гүйцэтгэх захирал н.Ууганбаяр нарын өгсөн үүрэг чиглэлийн дагуу малчдад туслах аяны хүрээнд нийт 100 сая төгрөгийн үнийн дүн бүхий өвс, тэжээл, хэрэгцээт бараа материалын тусламж үзүүлж байна. Малчид маань хатуу хаврыг өнтэй даваасай гэж хүсч байна. Мөн шаардлагатай тохиолдолд техник хэрэгсэл, хүн хүч зэргээр зам гаргах, аврах ажиллагааг зохион байгуулж байна."
Ц.Мөнхбат Дундговь аймгийн Засаг дарга:
"Өнөөдөр манай Дундговь аймгийн Гурвансайхан суманд үйл ажиллагаа явуулдаг Эрдэнэс Алт ресурс ХХК-ийн Салхитын мөнгөний уурхайн хамт олон өнөөдөр манай аймгийн Онцгой комисст хэрэгцээт бараа материал, өвс тэжээлийг хүлээлгэн өгч байгаад баярлалаа. Бид бүхэн энэ өвс, тэжээл, бараа материалыг зорилтот малчин өрхөд, сум орон нутгийн Онцгой комиссын шуурхай штабт хүлээлгэж өгөх чиглэлээр ажиллана."
Эрдэнэс Алт Ресурс ХХК-ийн Салхитын уурхайн ажилчид 21 хүний амь аварчээ
Аймгийн удирдлагуудад хүлээлгэн өгсөн 70 сая төгрөгийн үнэ бүхий хэрэгцээт зүйлсээс гадна уг компани уурхайн ойр орчмын сумдын малчдад өөрсдөө өвс тэжээл хүргэж өгөх ажлыг зам даваа хаагдсан үед техник хэрэгслээрээ зам гаргах ажлыг тогтмол гүйцэтгэж байна. Ингэснээр бодит тусламжийн хэмжээ 100 орчим сая төгрөгт хүрээд байгаа юм байна. Мөн байгалийн гамшигт үзэгдэл болсон үед шуурхай баг гарган эрэн хайх, аврах ажиллагааг зохион байгуулж байна. Энэ хүрээнд нийт 21 хүний амийг аварчээ.
Э.Очирсум “Эрдэнэс Алт Ресурс” ХХК-ийн ХАБГГ-ийн асуудал хариуцсан инженер:
"Эрдэнэс Алт Ресурс ХХК нийгмийн хариуцлагын хүрээнд Дундговь аймгийн Гурвансайхан сумын нутгийн малчдад өвс тэжээл хүргэх ажлыг зохион байгуулаад явж байна. Мөн зарим малчин өрхүүдийн гэртээ харих зам боогдсон тохиолдолд цас түрж, зам гаргах ажлыг хийж байна. Түүнчлэн байгалийн гамшиг тохиолдсон үед малчид, орон нутгийн замд зорчигчдыг авран хамгаалах ажлыг зохион байгуулж, өнгөрсөн хугацаанд нийт 21 хүнийг авран хамгаалаад байна."
Г.Самбалхүндэв Дундговь аймгийн Гурвансайхан сумын малчин:
"Би 2 дугаар сарын 18 нд өдөр 12 өнгөрч байхад малынхаа араас гарсан. Удалгүй тэнгэр харанхуйлаад юу ч харагдахаа больсон. Малаа эргүүлэх гээд дийлээгүй учраас зүгээр араас нь дагаад л яваад байсан. Азаар утас маань цэнэгтэй байсан тулдаа аавдаа “болохоо байлаа туслаарай” гээд хэл дуулгасан. Аав онцгой байдалтай холбогдоод Онцгойгийнхон уурханханд мэдэгдсэн юм билээ. Утасны цэнэг дуусаад асаагуурын гэрлээ дохиод л яваад байсан. Эндээс 14,15 км цаанаас орой 11 цагийн үед Эрдэнэс Алт Ресурс ХХК-ийн уурхайн ажилчид намайг олсон. Амийг минь аварсан Эрдэнэс Алт Ресурс ХХК-ийнхандаа баярлалаа гэж хэлье."
Дундговь аймгийн тухайд Улсын нөөцөд байсан өвс, тэжэээлийн нөөцөө үнэ төлбөргүйгээр бүх сумдын малчдадаа хуваарилаад дуусч байгаа юм байна. Өнгөрсөн онд Дундговь аймаг 3,6 сая толгой мал тоолуулсан бөгөөд одоогоор 120 гаруй мянган толгой мал хорогджээ. Эрдэнэс Алт ресурс ХХК-ийн зүгээс Их газрын чулуу байгалийн цогцолборт газартай хамтран үхсэн малын сэг зэмийг устгах, булах ажилд оролцохоор төлөвлөжээ.
