Сонгуультай жилд сошиал маргаан, талцал ихтэй. 2020 оны УИХ-ын сонгуулиас хойш хэдийнэ дөрвөн жил өнгөрчихөж. Дөрвөн жилд залуус ч өсөж, ухаажиж, нийт массын үзэл бодол тодорхой хэмжээнд өөрчлөгдсөн нь дамжиггүй.

Өмнө нь урлаг, соёлын оддыг нам засаг дэмжлээ гэж шүүмжилдэг л байсан. Гэхдээ энэ жил илүү хүчтэй байх шинжтэй. Сагсанбөмбөгийн тамирчин Э.Санчир Ерөнхий сайд Л.Оюун-Эрдэнийг дэмжихээ илэрхийлсний дараа багагүй шуугиан үүссэн. Шүүмжлүүлж, буруутгагдсан.

Тэгвэл өчигдөр "Нисванис" хамтлагийн ахлагч Л.Энх-Амгалан буюу Амгаа тоглолтынхоо үеэр "Данх бацааныг би дэмждэг. Миний үзэл бодол. Та бүхэн ч бас бодож үзээрэй" гээд хэлчихжээ. Энэ нь өнөө өглөөний сошиал дуулиан болж байна. Харин урьд урьдаас илүү "Нисванис"-ийг буруутгаж, сошиал тавцанд "дүүжилж" байна.

Ингэх тусмаа бас сонгох сонгогдох бөгөөд үзэл бодлоо илэрхийлэх эрхээ Үндсэн хуулиар баталгаажуулсан, ардчилсан улсад амьдарч буйгаа эргэн нэг санах л хэрэгтэй. Аливаа хүн улс төрийн сонирхлоо илэрхийлсэн бүрдээ доромжлолд өртдөг байж болохгүй. Харин олон нийтийг араасаа дагуулсан "Нисванис" шиг хэмжээний хамтлаг, уран бүтээлчид үүнийгээ хаана, хэрхэн хэлэхээ л зөв тооцох ёстой шиг ээ.