УИХ-д олон удаа сонгогдож, сайдаар дахин дахин томилогдохоороо сайн байдаг бол манай улс хөгжлийн манлайд хүрсэн. Мөн МАН, АН гэдэг улс төрийн хүчнийг дахин дахин төрийн дээрээ залаад нийгэм хөгжиж, амьдрал сайжирдаг бол дэлхийд эрэмбэтэй улс болчих байв. Харин ч эсрэгээрээ сонгогдох тусам луйврынх нь арга нарийсаж, томилогдох тусам хувийнх нь хөрөнгө ил далд өсдөг. Өнөөдөр манай парламентыг 1992 оноос хойш бүрдүүлж ирсэн МАН, АН эзэгнэсэн хэвээр байна. Даанч нийгмийн амьдрал сонгуулиас сонгуулийн хооронд уруудаж, жилээс жилд улам өнгөгүй болж байгааг надаар хэлүүлэх юун. Тэгвэл энэ парламент, Засгийн газрыг 3-5 удаа сонгогдсон гишүүд, 2-4 удаа сайдын суудалд заларсан эрхмүүд бүрдүүлдэг. Олон удаа сонголоо гээд та бидний амьдрал сайжирдаг бол хаадын зэрэгтэй амьдрахаар болсон. Одоо сонгогч түмэн ямар намаа төрийн дээр залж, ямар хүмүүсээр төрд төлөөлүүлж байснаа ухаарч байгаа бололтой. Бултаараа шинэ сонголт эрэлхийлж байна. Тиймээс бид энэ удаад олон сонгогдсон нөхдийн нэгээхэн хэсгээс чухам юу хийж, таны амьдралд ямар нөлөө үзүүлэв гэдгийг товчхон хүргэж байна. Хариултыг нь та улсынхаа хөгжил, өөрийнхөө амьдралаас хайна биз ээ.

Н.АЛТАНХУЯГ ТУУЛ ГОЛЫГ БОХИРДУУЛЖ БАЙГАА “ХААН ЖИМС”-ЭЭ Л АЖИЛЛУУЛ, ОДОО БОЛСОН

УИХ-д таван удаа сонгогдож, Үйлдвэр хөдөө аж ахуй, Сангийн, Тэргүүн шадар сайдаас Ерөнхий сайд хүртэл дэвшин ажилласан Н.Алтанхуяг энэ улс орон, ард түмний төлөө юу хийсэн бэ. Хэрвээ хийсэн бол нэрлэ гэхээр юу ч алга. Монголын улс төрд 30 жил яах гэж суудал бөглөж суусан юм бэ гэж хэн ч гайхна. Н.Алтанхуягаар нэрлэчих нэг ч өөдтэй хууль 30 жилийн хугацаанд санаачилан батлуулсангүй. Олон л хууль санаачлаа ч биз, батлуулаа ч биз. Хамгийн гол нь амьдралын хөрсөн дээр бодитоор эерэг тусгал болсон нь даанч алга. Тэгэхээр төрд энэ олон жил зүтгэхдээ улс орон, ард түмнийхээ төлөө юу ч хийгээгүй хүн хувьдаа хурааж цуглуулсан зүйл эрх биш байх байлгүй. Тэгээд ч одоо Туул голыг бохирдуулж байгаа “Хаан жимс” амралтаа нүүлгэн ажиллуулаад, чацаргана жимсээ тариалаад явсан дээр болов уу.

Ч.ХҮРЭЛБААТАР АА, ХОТГОР ШАНАГЫГ ЗАРСАН ОЛОН САЯ АМ.ДОЛЛАР ЧИНЬ ХҮРЭЛЦЭХГҮЙ БАЙНА УУ

УИХ-д гурван удаа сонгогдохдоо Түлш, эрчим хүчний сайдаас эхлээд Засгийн газрын хэрэг эрхлэх газрын дарга, Сангийн сайд, Эдийн засгийн хөгжлийн сайд хүртэл дэвшин ажиллахдаа юу хийсэн бэ гэхээр бас л хэлэх үг олдохгүй. Ганц өөдтэй хууль санаачлаагүй байж Хөрөнгө оруулалтын тухай хуулийг зүтгүүлсэн. Ингэхдээ гадныханд 100 жилээр газар ашиглуулахаар улайрч суугаа нөхөр. Тэгэхээр одоо зайгаа тавьж өгөх хэрэгтэй. Хотгор, шанагын уурхайг солонгосчуудад зарсан олон сая ам.доллар чинь амьдралд чинь хүрэлцэхгүй байна уу. Эсвэл газар нутгаа зарж, Монгол Улсыг гадныхантай хамт хувааж идэхээр шийдэв үү

Ц.ДАВААСҮРЭН УИХ-Д ДӨРӨВ, САЙДААР ХОЁР УДАА ТОМИЛОГДОХДОО “АРВАН ХУВЬ” НЭР Л ОЛЖ АВЛАА

УИХ-д дөрвөн удаа сонгогдож, Төсвийн байнгын хорооны даргаар хоёр удаа, Түлш, эрчим сайд, Барилгын хот байгуулалтын сайдаар ажиллахдаа юу хийв. Амьдралын хөрсөн дээр хэрэгжиж, иргэдийн ахуй амьдралд тус дэм болох нэг ч хууль санаачлаагүй. Энэ хугацаанд “Арван хувийн Ц.Даваасүрэн” гэх нэр олж авснаас өөр зүйл байхгүй. Ингэж зай бөглөж суухаар үнэн юм бол “арван хувь”-иар олж авсан хөрөнгөөрөө бизнес хийхгүй юу. Улсын хэмжээнд ганц Хөнгөн үйлдвэр барихаар Дархан-Уул аймагт ажил нь өрнөж байтал заавал өөрийнхөө хүнээр төслийг удирдуулна гээд гацаачихсан байна. Энэ хөвсгөлчүүд төдийгүй монголыг хорлосон том ажиллагаа гэдгийг эрх биш мэдэж байгаа биз.

СҮ.БАТБОЛДЫН ХӨРӨНГИЙГ ТООЛСНООС ТЭНГЭРИЙН ОДДЫГ ТООЛСОН НЬ ДЭЭР

Сү.Батболд УИХ-д таван удаа сонгогдож, Гадаад хэргийн дэд сайд, Ерөнхий сайд хүртэл дэвшин ажилласан хүн. Энэ хугацаанд юу хийв гэхээр хэлэх үг бас л олдохгүй. Ядахад амьдралын хөрсөн дээр бодитоор хэрэг болох ганц хууль санаачилж батлуулсангүй. Тэгэхээр “Скайтел” компанид 800.000 ширхэг хувьцаа, “Алтай Холдинг” компанид 4.733.950 ширхэг хувьцаа эзэмшдэг хүн. Үүнээс гадна олон зүйл бий. Нэгэнтээ “Сү.Батболдын хөрөнгийг тоолсноос тэнгэрийн одод тоолсон дээр” гэж хүртэл бичиж, ийм хэлц үг хүртэл болгож байлаа. Үүнийгээ л эргүүлж тойруулж сууна биз. Энд суудал бөглөхийн хэрэг юу байна.

Б.БАТ-ЭРДЭНЭ АВАРГА ХЭРЛЭНГИЙН ХӨДӨӨ АРАЛД БЭЛЧЭЭРЛЭХ ОЛОН МЯНГАН МАЛАА Л МАЛЛА

Б.Бат-Эрдэнэ УИХ-д аварга таван удаа сонгогдож, Батлан хамгаалахын сайд, Биеийн тамир, спортын асуудал хариуцсан сайдаар ажиллаж байна. Энэ хугацаанд ямар ч гавьяа байгуулсангүй, парламентын нэг лайвчин л болсон. Нэг ч хууль санаачлаагүй гэхэд болно. Одоо тэгэхээр “Аварга” биеийн тамирын дээд сургуулиа өөд нь татаж, Хэрлэнгийн хөдөө аралд бэлчээрлэх олон мянган малаа эргүүлж тойруулсан нь дээр байх. Үндэсний бөхөд баридах тодорхой нас, цаг хугацаа байдаг бол улс төрд ч байдаг юм шүү дээ. Үндэсний бөхийн дархан аварга болохоос биш улс төрд бол хэн ч биш гэдгээ мэддэг баймаар юм.

Г.ЗАНДАНШАТАР ТА Б.БАТЦЭЦЭГИЙНХЭЭ “МӨНХИЙН ҮСЭГ” КОМПАНИД ЗӨВЛӨХӨӨР АЖИЛЛА

Хүнс, хөдөө аж ахуйн дэд сайдаар эхлэн, Гадаад хэргийн сайд, Засгийн газрын хэрэг эрхлэх газрын дарга, УИХ-ын дарга хүртэл дэвшин ажиллахдаа УИХ-д дөрвөн удаа сонгогдсон Г.Занданшатар иргэн таны амьдралд ямар өөрчлөлт авчирав. Монгол Улсын хэмжээнд бол өөрчлөлт алга, ядахад Баянхонгорын хэмжээнд ахиц дэвшил гарав уу гэхээр бүгд л үгүй гэж байна. Парламентын хэмжээнд ядуу дүр эсгэсэн энэ нөхөр Гадаад харилцааны сайд Б.Батцэцэг, Байгал орчин аялал жуулчлалын сайд Б.Бат-Эрдэнэ анрыг өөрийн квотоор Засгийн газарт оруулж ирсэн бөгөөд тэдгээрээс санхүүжилт авдаг гэдэг. Төр засгийн өндөр дээд албан тушаалд хорь гаруй жил ажиллахдаа улс орон бүү хэл нэг сум хөгжүүлэх хэмжээнд ажиллаагүй, ганц өөдтэй хууль ч санаачлаагүй хүн Б.Батцэцэгийнхээ “Мөнхийн үсэг” компанид зөвлөхөөр ажиллавал яасан юм бэ.

Х.БАДЕЛХАН “БОЛДОГГҮЙ БОР ӨВГӨН” НЭР ЗҮҮТЛЭЭ БАЯН-ӨЛГИЙГ БУЖИГНУУЛЛАА, ОДОО БОЛНО

УИХ-ын гишүүнээр гурван удаа сонгогдож ажиллахдаа Барилга хот байгуулалтын сайдаар ажиллаж байсан Х.Баделхан хууль санаачилж, батлуулах нь бүү хэл парламентад байгаа үгүй нь мэдэгдэхгүй нэг нөхөр бий. Тэр өөрийн эзэмшлийн “Жол” компаниар дамжуулан, Баян-Өлгий аймагт жижиг том гэхгүй тендерүүдийг авч чаддаг гэдэг. Одоо түүний компанийг Баян-Өлгий аймагт хүү нь өвлөн ажиллуулдаг. Тиймээс Х.Баделханы хувьд одоо улс төрийн тэтгэврээ тогтоолгоод “Жол” компаниа удирдаад явахад хангалттай гэж үзэж байна. УИХ-д суудал бөглөнө. Зүгээр ч нэг суудал бөглөхгүй Баян-Өлгий аймгийн төр захиргааны томилгооноос эхлээд тендер хүртэл будилуулдаг “Болдоггүй бор” өвгөн болчихлоо.

Д.САРАНГЭРЭЛ УИХ-Д ГУРАВ СОНГОГДОЖ, САЙДААР ГУРВАН УДАА ТОМИЛОГДОХДОО ӨӨРӨӨ Л ХӨРӨНГӨЖЛӨӨ

УИХ-д гурван удаа сонгогдож, Эрүүл мэнд, Байгаль орчин, аялал жуулчлал, Хөдөлмөр, нийгмийн хамгаалал гэсэн гурван салбарын сайдаар ажилласан Д.Сарангэрэлд хаяглаж нааж болох ямар ажил байна гэхээр юу ч алга. Асар богино хугацаанд өндөр авсан шигээ асар богино хугацаанд хөрөнгөжиж, “Хатан эх” цол автал энэ төрд ажилласан. Ингэхдээ гурвын гурван салбарын сайдаар ажиллахдаа бүгдийнх нь ажлыг унагаасан. Эцэст нь иргэдээ “Улны” хэмээн доромжлох хүртлээ хөрөнгөжсөн ийм л хүн. Хүнд хэрэг болох нэг ч хууль санаачлан батлуулсангүй. Цар тахлын үед Эрүүл мэндийн сайдаар ажиллаж байхдаа аюулт тахлаар далимдуулан хэтэвчээ зузаалсан хүний нэг. Одоо нэгэнт баяжсан бол ард түмнийхээ зовлон зүдгүүр дээр олж цуглуулсан мөнгөөрөө амьдрахад болохгүй зүйл алга.

Л.ЭНХ-АМГАЛАН САЙДАА “ЭМ СИ ЭС”-ИЙН ХААЛГА ТАНД ҮРГЭЛЖ НЭЭЛТТЭЙ БАЙГАА

“Эм Си Эс” группын парламент болон Засгийн газар дахь төлөөлөл Л.Энх-Амгалан УИХ-д хоёр удаа сонгогдохдоо Боловсрол, шинжлэх ухааны сайдаар ажилласан. Жинхэнэ попын хаан өөр юу ч байхгүй. Атгахан ажлаа алд дэлэм болгож харуулдаг ихээхэн чадварлаг нөхөр олон хууль санаачилсан, батлуулсан л гэдэг. Хэрэгтэй зүйл даанч үгүй. Өнөөдрийн боловсролын салбарын нөхцөл байдал, хөвсгөлчүүдийн ахуй амьдралаас харахад Л.Энх-Амгалан улс төрийн тэтгэвэртээ гарах нь болжээ. Тэр яахав, “Эм Си Эс” группдээ л ажиллана биз. Парламентын хэмжээнд найман жил тус группын эрх ашгийг хамгаалсан гавьяа ч байгаа биз дээ.

Tumen.mn