Цавчаа ногоон буюу “Ногоон автобус”-ны хэрэгтэй холбоотой асуудлаар 05-р сарын 21-22-ны өдрүүдэд нээлттэй сонсгол хийхээр болжээ. Өнөөдөр "Ногоон автобус"-ны худалдан авах ажиллагаанд хяналт шалгалт хийх үүрэг бүхий түр хорооны дарга, УИХ-ын гишүүн Ж.Бат-Эрдэнэ энэ талаар мэдээлэл өгөв.
УИХ-ын гишүүн Ж.Бат-Эрдэнэ: Гурван асуудлын хүрээнд сонсгол явагдана. Нэгт худалдан авах ажиллагаатай холбоотой асуудал. Хоёрт хуулийн хүрээнд ажиллаж байсан уу гэдгийг үзнэ. Гуравт ногоон автобусны чанар, стандарттай холбоотой мэдээллийг ард иргэдэд өгнө. Хоёр хоногийн хугацаанд нээлттэй сонсгол явагдана.
Төрийн хяналт шалгалтын хуулийн дагуу үйл ажиллагаа явуулдаг төрд тангараг өргөсөн хүмүүс шинжээчээр ажилласан. Урьд өмнө нь асуудлыг яриад өнгөрдөг байсан бол одоо нээлттэй сонсгол явуулж, мэргэжлийн шинжээчид томилж байгаад хууль хаана, яаж зөрчигдсөн талаар олон нийтэд мэдээлж байна. Энэ бол УИХ, Засгийн газраас хууль бус зүйлтэй тэмцэж буй томоохон ажил юм.
Энэ сонсголд Монгол Улсын сайд, Улаанбаатар хотын түгжрэлийг бууруулах үндэсний хорооны дарга асан Ж.Сүхбаатар, Улаанбаатар хотын түгжрэлийг бууруулах үндэсний хорооны албаны дарга Ц.Батгэрэл, Нийслэл засаг дарга бөгөөд Улаанбаатар хотын захирагч асан Д.Сумъяабазар, Нийслэлийн засаг даргын нэгдүгээр орлогч Ж.Сандагсүрэн, Нийслэлийн засаг даргын ахлах зөвлөх Д.Мөнх-Эрдэнэ, Тэнүүн-Огоо компани захирал болон бусад холбогдох хүмүүсийг гэрчээр дуудсан. Түр хорооноос гэрчээр дуудаж байгаа хүмүүстээ албан тоот явуулж байгаа.
