Либертари Намын үүсгэн байгуулагч, комедиан Д.Амартүвшин мэдээлэл хийлээ. Энэ үеэрээ тэрээр: "УИХ-ын 2024 оны сонгуульд хамтарч оролцох саналыг Либертари Намд нийт зургаан нам, эвслээс тавьсан.
Бид АН-ыг сонгосон. Сүхбаатар, Чингэлтэй дүүрэгт тойрог дээр өрсөлдөж орно гэдэг зүйлийг тохирсон байсан.
Ингээд АН-тай хамтарч сонгуульд орохоор болсон. Яагаад тойрог дээр өрсөлдөх ёстой вэ? гэхээр нэгдүгээрт, хүмүүсийн дунд орж, үзэл санаагаа таниулах нь чухал байсан. Хоёрдугаарт, Сүхбаатар дүүргээс ЖДҮ авсан, цүнх барьдаг, бөгс долоодог, эрх чөлөөнд халтай хуулиуд баталдаг хүмүүс нэр дэвшиж байгаа. Ийм хүмүүсийг байх ёстой байранд нь тавья, энэ хүмүүстэй шууд нүүр тулж, хүчээ үзье гэж бодож байсан. Гэтэл АН-ын шийдвэрээр энэ нь боломжгүй болж, жагсаалтанд орсон. Бид угжны хурга биш, жагсаалтанд орох сонирхолгүй байна. Тийм учраас бид жагсаалтаас нэрээ татаж байна. Боломж олгосон хүмүүстээ баярлалаа.
Либертари намаас 2 хүн жагсаалтаар, би өөрөө Сүхбаатар, Чингэлтэй дүүрэг дээр тойрогт гээд гурван хүн АН-аас УИХ-ын сонгуульд оролцоно гэж ярьсан. Даанч яриандаа хүрсэнгүй.
2 тал гэрээ хийгээд, аль нэг тал нь гэрээгээ зөрччих юм бол тухайн гэрээ хүчингүй болдог шүү дээ. Яг тэр зарчмаар бидний тохироо яриандаа хүрсэнгүй. Тийм учраас гэрээнээсээ татгалзаж, нэрээ татах шийдвэрт хүрлээ. " гэв.
