Улс төрийн намууд нэр дэвшигчдээ тодруулж, горилогчдын санаа шулуудав бололтой. Энэ удаагийн сонгуулийн өнгийг харж байхад шинээр горилж буй олон нэр дэвшигчид байна. Тэр тусмаа Улаанбаатар хотын тойргуудад ширүүн өрсөлдөөн болох ч нийслэлчүүд шинэ тутам УИХ-д горилж байгаа нөхдөд илүү талтай байгаа нь илтэд харагдана. Сонгинохайрхан дүүргийг аваад үзэхэд дүүргийн Засаг дарга, дүүргийн МАН-ын дарга Н.Алтаншагай багаа ахалж орохоор болжээ. Тус дүүрэгт түүнээс гадна УИХ-ын гишүүн Э.Батшугар, нийслэлийн Засаг даргын нэгдүгээр орлогч П.Сайнзориг, Соёлын сайд Ч.Номин, Эрүүл мэндийн сайд асан Н.Хүрэлбаатар нар нэр дэвшихээр болсон. Үүнээс харахад таван нэр дэвшигчийн нэг нь л УИХ-ын гишүүн байгаа бол бусад нь дандаа анх удаа УИХ-д нэр дэвшин өрсөлдөж байгаа дүрүүд учраас иргэд олон нийт таатай хандаж байгаа бололтой.

Гэхдээ сонгогчид шинэ тутам хүмүүст дуртай байгаа ч аанай л төрийн албаны дадлага туршлага, хийсэн бүтээсэн зүйлийг харж байгаа бололтой. Сонгинохайрхан дүүргийн Засаг дарга Н.Алтаншагайгаар жишээ татахад тэр дүүргийн Засаг даргын орлогчоос дүүргийн Засаг даргад дэвшиж, дөрвөн жил ажиллахдаа бүтээн байгуулалтаас эхлээд нийгмийн олон чиглэлд зөв бодлого гарган ажилласан нь ихээхэн үр дүнгээ өгсөн гэдгийг иргэд олон нийт ярьдаг. Энэ л дөрвөн жилийн амжилт нь залуу даргад ах намаас мандат болж ирээ биз ээ.

Сонгинохайрхан дүүрэг нь орлого бүрдүүлэлтгүйн улмаас жил бүр Нийслэлээс татаас авдаг, тэр хэрээрээ бүтээн байгуулалтаас хоцордог байсан бол сүүлийн жилүүдэд нийслэлээс татаас авахаа больж, санхүүгийн хувьд бүрэн бие даасан зэрэг эерэг асуудал байгаа нь ч Н.Алтаншагайгийн нэр хүндэд эерэг нөлөөлөл үзүүлээд зогсохгүй багийг дээш өргөж байгаа аж.