Эрүүл мэндийн чиглэлээр үйл ажиллагаа явуулдаг “Рафаэл Интернэйшнл” ТББ нь БНСУ-ын Экспорт Импортын банк (The Export Import Bank of Korea), Нийгмийн сайн сайхны төлөө сан (Community Chest of Korea) болон Рафаэл Сан(Raphael Nanum)-тай хамтран сумдын эрүүл мэндийн төвийн эмч ажилчдын хувийн хамгаалах хэрэгслийн нөөц бүрдүүлэхэд туслалцаа үзүүлэх төслийг хэрэгжүүлж дууслаа.

Эрүүл мэндийн хамгаалах хэрэгслийг хандивлах сумдын нээлттэй сонгон шалгаруулалтыг 2024 оны дөрөвдүгээр сард зохион байгуулсан юм. Энэ хүрээнд Архангай аймгийн Цэнхэр сумын Эрүүл мэндийн төв, Баянхонгор аймгийн Богд сумын Эрүүл мэндийн төв, Говь-Алтай аймгийн Эрдэнэ сумын Эрүүл мэндийн төв, Ховд аймгийн Мянгад сумын Эрүүл мэндийн төв, Сүхбаатар аймгийн Баяндэлгэр сумын Эрүүл мэндийн төвд шаардлагатай хувийн хамгаалах хэрэгслийг хандивлах үйл ажиллагааг зохион байгуулав. Дээрх сумдын Эрүүл мэндийн төв тус бүрд К94 маск 1200 ширхэг, нэг удаагийн бээлий 1600 ширхэг (32 хайрцаг), нэг удаагийн улавч 2000 ширхэг, нэг удаагийн малгай 800 ширхэг, хамгаалалтын хувцас 200 ширхэг тус тус хандивлалаа.