Баянгол дүүрэгт “удирдах албан тушаалтан, албан хаагчид, тэдний гэр бүл” гэсэн онцгой нэгэн “давхарга” төсвийн мөнгөөр гадаад явах боломжийг гайгүй сайн ашиглаж байдаг гэхэд хилсдэхгүй болжээ. Үүний нэг жишээ нь Солонгосын “Хайрын өргөө” гэдэг нийгмийн сайн сайхны төлөө гэр бүлийн нийгэмлэгтэй Баянгол дүүргийн ИТХ хамтран ажиллах санамж бичиг байгуулсан “түүхэн” үйл явдлаас харж болно. Дүүргийн ИТХ нь нэрнээс харахад л христийн шашных байж магадгүй нийгэмлэгтэй гэр бүлийн боловсролын ач холбогдолыг таниулах, түгээх, эрүүл гэр бүлүүдийг бий болгох, үүний тулд сургагч багш нарыг бэлтгэх чиглэлээр хамтарч ажиллах гэж байгаа юм шиг байна. Зүй нь өөрсдөө хамтарч ажиллах биш, оронд нь дүүргийнхээ ижил төстэй үйл ажиллагаа явуулдаг ТББ-тай холбож өгвөл илүү оновчтой байсан ч тэгсэнгүй. Гадаадад явах боломж үүнээс гарч байгаа тул гэх хардлага шууд төрж байна. Боломжийг ч тултал нь “ашиглажээ”. Тушаалын гадаад томилолтын зорилгын эхэнд “... Баянгол дүүргийн удирдах албан тушаалтан, албан хаагчид, тэдний гэр бүл ...”-д гэж оруулжээ. Араас нь нэр төдий “... иргэдэд ...” гэсэн байна. Тэгвэл “гэр бүлийн боловсрол”-ын ач холбогдлыг таньж мэдэхээр Солонгос явагсадын дунд үзээд өгье гэсэн ч нэг ч жирийн иргэн байтугай гэр бүлийн чиглэлээр үйл ажиллагаа явуулдаг ТББ-ын төлөөлөл алга, дандаа удирдах албан тушаалтан, албан хаагчид оржээ. Жагсаалтыг мэдээж гадаадад хамгийн их явдаг Б.Сэмжидмаа хатагтай тэргүүлжээ. Араас нь долоон төлөөлөгч дагалдсан байна. Хурлын ажлын албаны дарга, мэргэжилтэн ажилтан нар харь орноос гэр бүлийн боловсролын ач холбогдол гэгчийг олж авахаар тэдэнтэй ханьсжээ. Төлөөлөгчдийн бүрэлдэхүүнээс харахад Баянголын ИТХ-ын дарга төлөөлөгч ажилтан нарт гэр бүлийн боловсрол их дутагддаг гэмээр. Уг нь гэр бүлийн боловсролын ач холбогдлыг таньж мэдэхийн тулд заавал ИТХ-ын дарга төлөөлөгч, эсвэл тэдний гэр бүлийн гишүүн байх шаардлагагүй. Дунд сургуулийн ахлах ангийн сурагч ч үүний чухлыг хэлээд өгнө. Баянголын ИТХ-ын төлөөлөгчид дотооддоо янз бүрийн сургалт дамжаанд төсвийн гурван сая төгрөгөөр “сурч” мөн “чадавхижих”-даа ихэд сайн. Тэгвэл өдгөө бүр гадаадад очиж “чадавхиждаг” болжээ. Мөн тушаалд “... эрүүл гэр бүлүүдийг бий болгох ...” гэж заасан. Ийм олон дарга төлөөлөгч, ажилтан нэг дор явж байхыг бодоход ИТХ-д нь эрүүл гэр бүл их цөөхөн гэх хардлага бас харамсал төрж байна. Үнэхээр тийм бол бүгдээрээ явсан ч яахав дээ ... Түүнээс гадна тушаалд “... сургагч багш бэлтгэх ...” зорилготой гэсэн. Ингэхлээр Б.Сэмжидмаа дарга болон төлөөлөгчид гэр бүлийн боловсролын багш болоод буцаж ирсэн болж таарч байна. Бодвол одоо төсвийн 31,8 саяар Солонгосоос сурч ирсэн гэр бүлийн боловсролоо эхний ээлжинд Баянгол дүүргийн удирдах албан тушаалтан, албан хаагчид, тэдний гэр бүлийн хүрээнд түгээгээд, ИТХ-аасаа эрүүл гэр бүлүүд төрүүлээд мундаг ажиллаж байгаа байх даа ...
Alim.mn
