Улс төрийг хувь эрх ашгаа гүйцэлдүүлэх гүүр гэж харалгүй, нийгэм нийтийн төлөө шийдвэр гаргах эрх мэдэл, түүнд нөлөөлөх, оролцох, хэрэгжүүлэх үйл явц гэсэн эрүүл амбицаар харж чадаж буй залуу улстөрчид бол УИХ-ын сонгуулийн 4-р тойрог Булган, Хөвсгөл Орхон аймагт Ардчилсан намаас нэр дэвшиж буй Хаш-Эрдэнийн Эрдэнэбаатар, Гүнширийн Мөнгөнхуяг хоёр юм.
Хоймор нутаг Хөвсгөлөөс хоёр загал мэт хос лидер улс төрд гарч ирж байна гэх олны яриа ч тэднийг дагах болсныг тодотгоё. Энэ удаагийн УИХ-ын сонгуульд 126 суудлын төлөө 1336 нэр дэвшигч өрсөлдөж буйн 966 нь тойрогт, 370 нь нам, эвслийн жагсаалтаар нэр дэвшиж байгаа. Түүнчлэн 1336 нэр дэвшигчээс ялгарна гэдэг үнэндээ амар зүйл биш. Хэдий тийм ч Х.Эрдэнэбаатар, Г.Мөнгөнхуяг хоёрын тухайд бусад олонх шиг сонгогдохын тулд өөрсдөөсөө өөр дүр бүтээж, гоёчилсон, хийрхсэн амлалтууд өгөлгүй, бодитой зүйлс хэлж, ярьж, үнэнээрээ, шийдлийн төлөө байгаагаараа ялгарч чадаж байна.
Нэр дэвшигч Х.Эрдэнэбаатар өөрийнхөө талаар хэлэхдээ, "Гүн хөх нуурынхаа хөвөөнд өсч, төрж, өндийсөн энгийн л нэг аав, ээжийн хүү. Хүмүүс гайхдаг юм. Чи ийм дуу цөөтэй, хүн бүхэнтэй найзархаад байдаггүй, хаалттай өөрийнхөөрөө хүн улс төрд тохирох уу гэж асуудаг нь олон. Улс төрийг алиа салбадай болгон нь сонирхдог гэж би боддоггүй. Нутаг усныхан иргэдийнхээ амьдралыг өөд нь татъя, улс орноо хөгжүүлье гэж бодож их улс төрд хөл тавиад багагүй хугацаа өнгөрсөн байна. Бусдад таалагдах гэж худал амлалт өгч, алтан цээжтэй, мөнгөн бөгстэй мэтээр өөрийгөө рекламдахгүй ээ. Үзэл бодол, үнэт зүйл, сурсан мэдсэнээрээ цэвэр сайхан өрсөлдөж өргөн олноороо дүгнүүлнэ ээ. Сонгууль яахавдээ хугацаатай, шаагиад өнгөрөх бороо шиг түр зуурынх. Тиймээс бүгд хүн чанараа гээлгүй шударга сайхан эр улс шиг өрсөлдье гэдэг бодол өвөрлөөд нутгийн зүг жолоо залж байнаа" гэсэн байсан. Мөн "Өөрийгөө ямар хүн бэ гээд бодохоор их бардам юм шиг санагддаг. Ялагдах дургүй. Тийм ч учраас аливаа зүйлийг эхлүүлсэн бол дуустал нь бүрэн хийх гэж хичээдэг” хэмээн ярьсан байсан. Үнэхээр ч сонгууль угтсан хэдэн өдрийн хооронд худлаас ангид, үнэнд ойр байж, үйлдлээсээ зөрөх үг ярьж явах хэмжээний төлөвшилтэй залуу, зангарагтай улстөрч гэдгээрээ ялгарч тод харагдаж буй юм.
Нэр дэвшигч Гүнширийн Мөнгөнхуягийн тухайд аливаад хандах хандлага нь цэгц шударга, хэлсэн бол хийгүй байх гэж зүтгэдэг, аймгийн ИТХ-ын даргын хувиар нутаг орныхоо асуудлыг сайн мэдэх, хийсэн зүйл арвинтай, хэлэх үгтэй улстөрч юм. Хөвсгөл аймгийн Монголын Ардчилсан Холбооны дарга тэрбээр ардчиллыг төгөлдөржүүлэхэд хувь нэмрээ оруулж яваа холын хараатай улстөрч. Түүний талаарх бусдын сэтгэгдлээс дурдахад, "Аймгийн ИТХ-д ард түмнийхээ итгэлийг өвөрлөн 4 жил Галт нутгийн зээ Гүнширийн Мөнгөнхуягтай хамтран ажиллалаа.Төрийн алба мэдэхгүй, баян айлын учир мэдэхгүй хүүхэд гэдэг нүдээр анх харж байлаа. Хүний сайныг ханилж мэддэг гэдэг ардын үг үнэн юм. Миний төсөөллийг 360 градус эргүүлсэн энэ хүн! Монгол төрд зүтгэх ёстой! Ачааны хүндийг ард түмнийхээ өмнөөс үүрч чадах ухаан түүнд заяагдмал юм билээ!" гэсэн нь байна.
Гүнширийн Мөнгөнхуяг сонгогчидтой хийсэн уулзалтынхаа үеэр, "Хадуурдаг моринд хазаар хэрэгтэй..." хэмээн тодотгосон нь энэ цаг үед яах аргагүй анзаарч харах ёстой мессеж гэдгийг хэлье. "МАН-ынхан нэг гараараа шударга ёс ярьж, нөгөө гараараа хулгай хийдэг болжээ. Бид бүхэн үүнтэй эвлэрч чадахгүй... Яг одоо бидэнд өөрчлөлт хэрэгтэй байна" хэмээн тэрбээр сануулж байна лээ. Үнэхээр ч өнгөрсөн жилүүдийн алдааг засах өөрчлөлтийг нэн хэрэгтэй, шаардлагатай байгаа энэ л үед хийхгүй бол эцсийн дүндээ ард түмэн л хохироод үлдэнэ. Тиймээс Хөвсгөлчүүд Хаш-Эрдэнийн Эрдэнэбаатар, Гүнширийн Мөнгөнхуяг гэсэн нутгийн хоёр залуудаа итгэсэн шиг итгэл хүлээлгэвэл тэд энэ улс оронд ус агаар мэт шаардлагатай байгаа алдагдсан 8 жилийн алдааг засахад жин дарах хувь нэмрийг оруулах нь лавтай юм.
Tumen.mn
