Шадар сайд С.Амарсайхан: Бөхчүүд адын зүйлд автаж, ард түмний итгэлийг алдаж болохгүй

Өнгөрсөн жилийн Үндэсний их баяр наадмын түрүү бөх М.Бадарч допинг хэрэглэсэн нь эцэслэн тогтоогдсон.

Үүгээр түүний цолыг хурааж, унасан бөхчүүдэд цол нөхөн олгох зарлигийг Монгол Улсын Ерөнхийлөгч гаргасан.

Улмаар өнөөдөр (2024.06.17) Шадар сайд, Баяр наадмыг зохион байгуулах хорооны дарга С.Амарсайхан М.Бадарчид өвдөг шороодсон бөхчүүдэд цол, чимэг нөхөн олголоо.

Энэ хүрээнд:

  • Аймгийн хурц арслан Бүрнээгийн Баянмөнхийг тав давсанд тооцож улсын начин
  • Өсөх идэр начин Эрдэнэбатын Дашийг зургаа давсанд тооцож улсын харцага
  • Улсын харцага Сүхбаатарын Сүхбатыг долоо давсанд тооцож улсын заан
  • Улсын гарьд Цэрэнсодномын Бямба-Отгоныг ес давсанд тооцож улсын арслан
  • Улсын аварга Оргихын Хангайд “үлэмж бадрах” чимэг, цол тус тус нөхөн олголоо.

Шадар сайд С.Амарсайхан энэ үеэр,

"Өнгөрсөн наадмын түрүү бөх сэргээш хэрэглэсэн нь тогтоогдсон. Иймд хуульд заасны дагуу тавын даваанаас хойших түүний давсан бөхчүүдэд шинээр цол олгох зарлигийг Монгол Улсын Ерөнхийлөгч гаргасан.

Монголчууд бөхчүүдээ шүтэн биширч, сүр хүч, цог хийморийн бэлгэдэл болгодог. Харамсалтай нь дэг жаяг сулрах ёс суртахууны доройтолд орох эрсдэлд хүрч байна. Булхай, будилаан, найраа, наймаа, нанчилдааны талбар болж магадгүй нь гашуун үнэн. Харин бөхийн дэвжээ байх ёстойг их аваргууд, мастерууд мэдэж байгаа. Бөхийн дэвжээний үнэ цэнийг ингэж унагах эрхгүй бөгөөд боломжгүй гэдгийг зуун зуун жилийн үүх түүх нотолж, өвлүүлэн үлдээсэн. Үндэсний спортоос гадна нүүдэлчдийн зан заншил, сэтгэлгээний онцлог үүнд бий. Нэг хэсэг жудаггүй бөх, дасгалжуулагчаас болж ийм үйл явдал газар авч болохгүй. Бөхчүүд адын зүйлд автаж, ард түмний итгэлийг алдаж болохгүй.

Нэг давж, нэг хэсэг шагнал урамшуулал авч л байвал Монголын эрх ашиг хамаагүй хэмээн огтхон ч болохгүй. Цаана нь үндэсний эрхэмлэл, үнэ цэн, үндэсний уналт босолтын хувь заяа явж байдгийг бүгдээрээ анхаар. Наадмын бэлтгэл чамбайрч, бяр хүч тэгширч байгаа гэдэгт итгэлтэй байна. Нэр хүндийг өндөрт өргөж явахыг дахин захиж байна. Монгол бөхийн босоо цагаан хийморь үргэлж та бүхнийг ивээж явах болтугай" гэлээ.

Б.Жаргалсайхан: АН-ынхан ёс зүйгээ гээсэн зэрлэгүүдийн нийгмийг санагдуулж байна
Б.Жаргалсайхан: АН-ынхан ёс зүйгээ гээсэн зэрлэгүүдийн нийгмийг санагдуулж байна
 
Т.Мөнхсайхан: Үнэтэй, чанаргүй эмийн асуудалд бодит өөрчлөлт хийнэ
Т.Мөнхсайхан: Үнэтэй, чанаргүй эмийн асуудалд бодит өөрчлөлт хийнэ