Гадаад улсад ажиллаж, амьдарч буй иргэдийн саналыг өнөөдрөөс авч эхэллээ. Холбогдох хуульд заасны дагуу гурав хоногийн хугацаанд буюу энэ сарын 21, 22, 23-нд санал хураалт болно.

Япон улсын Осака хотын ахлах сургуульд суралцдаг М.Энхцэлмэг анх удаа санал өгч буй тухай сэтгэгдлээ цахимд хуваалцжээ. Тэрбээр "Би 18 настай. Анх удаа сонгуульд оролцож, саналаа өгч байна. Дээлээ өмсөөд гарахад Монголдоо байгаа юм шиг дотно санагдсан. Төрийн дууллаа сонсч, анхны сонгогч болж, анх удаа саналаа өгсөндөө маш их баяртай байна. Үеийнхэндээ хандаж хэлэхэд, сонгуульдаа идэвхтэй оролцохыг уриалж байна" гэжээ.

Энэ мэтчлэн гадаад дахь монголчууд саналаа өгч, улмаар сэтгэгдлээ цахим хаягаараа дамжуулан илэрхийлсээр байна. Ингэхдээ улс төрийн ууган хүчин Монгол Ардын нам гадаад дахь монголчуудын тод төлөөлөл, чанга дуу хоолой болж чадах Японы “Ниппон Коэй” ХХК-ийн Хот байгуулалтын хэлтсийн дэд менежер, хот төлөвлөлтийн инженер, доктор Г.Лувсанжамц, АНУ-ын Харвардын Анагаах ухааны их Сургууль, Харвардын Нийгмийн эрүүл мэндийн сургуулийн дэд профессор Д.Ганмаа, Австралийн RMIT их сургуулийн цахилгааны инженер, доктор М.Энхцэцэг тэргүүтэй мэргэжлийн экспэртүүдийг жагсаалтдаа багтаасанд талархаж, Монгол Ардын намыг дэмжиж буйгаа илэрхийлж байна. Энэ удаагийн УИХ-ын сонгуульд гадаадад ажиллаж, амьдарч буй иргэдээс 13095 нь саналаа өгөхөөр бүртгүүлжээ. Насны хувьд хамгийн залуу нь 18-19 насны 687, хамгийн ахмад нь 70 ба түүнээс дээш насны 104 хүн байгаа аж.