Хөвсгөл, Булган, Орхон аймаг буюу дөрөвдүгээр тойрогт сонгуулийн тухайд эргэлт гарах бололтой. Учир нь АН ихэнх тойрогт сулхан дүрүүд илгээсэн хэрнээ дөрөвдүгээр тойрогт Ерөнхийлөгч асан Х.Баттулга, Х.Эрдэнэбаатар, Г.Мөнгөнхуяг, Б.Ариун-Эрдэнэ нараар өнгөлүүлсэн ширүүхэн баг илгээжээ. Дөрөвдүгээр тойрогт АН-ынхан урьдчилсан байдлаар УИХ-ын гишүүний тангаргаа өргөчихсөн явна.

Өөр ч арга алга. Хөвсгөлчүүд УИХ-ын гишүүн Ц.Даваасүрэн, Л.Мөнхбаатар, Л.Энх-Амгалан нараас уйдаж залхасан байх. Арга ч үгүй, олон удаа сонгогдсон нөхөд орон нутгийнхаа тойрогт юу ч хийсэнгүй. Хөвсгөл аймгийн хэмжээнд өнөөдөр ч сургууль, цэцэрлэгийн хүртээмжээс эхлээд зам талбай, барилга гээд яриад байвал авах зүйл байхгүй. УИХ, орон нутгийн хэмжээнд МАН хэчнээн ч удаа ялалт байгуулж, засаглав даа. Даанч юу ч алга.

Ядахад Засгийн газар, МҮХАҮТ-аас жил бүр шалгаруулдаг аймгуудын өрсөлдөх чадвараар сүүлийн 10 гаруй жил сүүлээсээ айргийн гуравт багтдаг ийм аймаг болтол доройтуулсан нөхдийг чулуугаар шидээд хөөхдөө тулж байна. Нөгөө талаар МАН ч тэднээс залхасан байх. Яагаад гэхээр Ц.Даваасүрэнгээс эхлээд эрх ашгийнхаа төлөө сайдын суудал нэхэн шантааж хийж, намынхаа сайд нарын баримт фактыг түмэн олонд дэлгэнэ. Сонгууль дөхөхөөр МАН-ын байгуулсан Оюутолгойн гэрээг шүүмжилж, намаа хусна гэхээр ямар ч улс төрийн хүчин залхаж таарна. Үүнээс гадна МАН-аас Б.Бат-Эрдэнэ сайд нарын тааруухан өрсөлдөгчид явна.

Ийм суларсан тойрогт Х.Баттулга багаараа тоглохгүй бол өөр хэн тоглох юм. Тэр тусмаа Монгол Улсын хэмжээнд тоглолт хийж чаддаг Х.Баттулга бол ганцхан тойргийг багаараа аваад гарна. Түүнийг шилийг даран жинхэнэ “Ард түмний хүү” болтлоо популизм хийсэн Ж.Батзандан гэхээр Хөвсгөл аймгийн гурав лав зайгаа тавьж өгөхөөс өөр аргагүй болжээ. Түүнчлэн “Женко” тэргүүтнийг очсон газар бүхэн хүндлэл үзүүлж байгаа нь ч нэгийг хэлнэ. Тэгээд ч Хөвсгөл аймаг нь орон нутагт анх удаа ардчиллын галыг асаасан өлгий нутаг гэхээр тал талын тохироо бүрдэж байна.

Tumen.mn