СОНГУУЛИЙН ЕРӨНХИЙ ХОРООНЫ ЭРГЭН ТОЙРОНД

Өнгөрөгч хавраас хойш, тэр тусмаа сүүлийн өдрүүдэд Сонгуулийн Ерөнхий Хороо тун завгүй ажиллаж байна. Тиймээс тус хорооноос цаг үеийн мэдээллийг хугацаа алдалгүй хүргэж, иргэд сонгогчдоо мэдээллээр хангаж байгаа билээ. Энэ жилийн сонгуулийн сурталчилгааны ажиллагаа тайван өрнөж, нам, эвсэл, нэр дэвшигчид бие бие рүүгээ дайрсангүй намдуухан явж дууслаа. Сонгогчдын хувьд ч гэсэн элдэв талцал байхгүй, дор бүрнээ нам, эвсэл, нэр дэвшигчдийн дэвшүүлж буй бодлого, Мөрийн хөтөлбөрт үнэлэлт дүгнэлт өгч гээд харьцангуй өөр болсныг судлаачид ч хэлж байна. Ингээд Сонгуулийн Ерөнхий Хороо тойрсон мэдээ мэдээллээс хүргэж байна.

-П.ДЭЛГЭРНАРАН:ДОТООДЫН АЖИГЛАГЧААР 30 МЯНГАН ХҮН АЖИЛЛАНА-

Сонгуулийн Ерөнхий Хорооноос цаг үеийн асуудлаар ээлжит мэдээлэл хийлээ. Мэдээллийн эхэнд СЕХ-ны дарга П.Дэлгэрнаран хэлэхдээ “УИХ-ын сонгуулийн сурталчилгаа амжилттай болж өнгөрлөө Энэ удаагийн УИХ-ын сонгуульд нэр дэвшигчдийн 61.3 хувь нь эрэгтэй, 38 хувь нь эмэгтэй байлаа. Энэ жил гадаадад байгаа иргэд цахимаар бүртгүүлж, өөрийн биеэр ирж саналаа өгцгөөлөө. Маргааш орой бүх хэсгийн хороод хаагдсаны дараа гадаадад байгаа иргэдийн саналыг задалж, тоолж, нэгтгэнэ. Сүлжээгүй газруудад 400 гаруй старлинк төхөөрөмжийг ашиглаж байгаагаараа онцлог. Мөн улсын хил дагуух газар зөөврийн хайрцаг явуулахаас өөр аргагүй байна. Тэнд огт сүлжээгүй байдаг. УИХ-ын сонгуулийн явцыг Европын парламентын төлөөлөгчид ирж, ажиглалт хийнэ. Харин дотоодын ажиглагчаар 30 мянган хүн ажиллана. Энэ жилийн ажиглагчдын тоо өргөн хүрээнд болж байна” гэв.

-ОДООГИЙН БАЙДЛААР 900 ГАРУЙ ХЭРЭГ ЗӨРЧЛИЙН ГОМДОЛ ИРЖЭЭ-

Улсын Бүртгэлийн Ерөнхий газар, Цагдаагийн Ерөнхий газар, “Бодлогод залуучуудын хяналт” ТББ-ын төлөөллүүд товч мэдээлэл хийж, иргэд сонгогчдод хандаж анхаарах зүйлсийн талаар зөвлөмж өглөө. Одоогийн байдлаар Цагдаагийн байгууллагад сонгуультай холбоотой 900 гаруй гэмт хэрэг, зөрчлийн гомдол мэдээлэл ирээд байна. Тэр бүхнийг нарийвчлан шалгаж байгаа гэнэ. Зөөврийн хайрцагаар санал авч байгаа. Зарим тохиолдолд тухайн санал өгөх иргэн хаяг байршилдаа байхгүй байх тохиолдол байгааг анхаарах хэрэгтэй байна гэв. Сонгогчид санал байранд ирээд гадна болон дотор талд тавьсан мэдээлэлтэй сайн танилцаж, шаардлагатай бол Сонгуулийн хэсгийн хорооны ажилтнаас зөвлөлгөө авч санал өгч болно гэдгийг санууллаа.

-БИТҮҮМЖИЛСЭН ХАЙРЦГИЙН САНАЛЫГ “ХАР МАШИН”-Д УНШУУЛНА-

УИХ-ын ээлжит сонгуулиар зөөврийн битүүмжилсэн саналын хайрцгаар санал авах үйл ажиллагаа зургаадугаар сарын 27-ны өдрийн 09.00 цагаас эхэлж, хэсгийн хорооны гишүүд хэсгийн хорооны даргын баталсан хуваарь, чиглэлийн дагуу нийслэл, сумын нутаг дэвсгэрийн хэмжээнд сонгогчдын саналыг оршин байгаа газарт нь очиж авч байна. Сонгуулийн ерөнхий хороонд хэсгийн хороодоос 2024 оны 6 дугаар сарын 27-ны өдрийн 16.30 цагт ирүүлсэн мэдээгээр 12220 сонгогчоос зөөврийн битүүмжилсэн саналын хайрцгаар санал аваад байна. Зөөврийн битүүмжилсэн хайрцгаар санал авах ажиллагаа Улс төрийн нам, эвсэл болон төрийн бус байгууллагын ажиглагчдын хяналт доор болдог бөгөөд 20.00 цагт дуусна. Зөөврийн битүүмжилсэн саналын хайрцгийг 2024 оны 6 дугаар сарын 28-ны өдөр санал авах ажиллагаа эхлэхэд зөөврийн битүүмжилсэн саналын хайрцгийн битүүмжлэлийг нээж, саналаа өгсөн сонгогчийн саналыг хуудсыг санал тоолох төхөөрөмжид уншуулах юм.

-МОНГОЛ УЛСЫН СОНГУУЛИЙН ҮЙЛ АЖИЛЛАГААГ АЖИГЛАХААР 40 УЛС СЕХ-НД БҮРТГҮҮЛЖЭЭ-

УИХ-ын ээлжит сонгуулийн үйл ажиллагааг ажиглахаар 40 улс, 21 байгууллагын 259 ажиглагч Сонгуулийн ерөнхий хороонд бүртгүүллээ. Ажиглагчдын 191 нь Европын аюулгүй байдал хамтын ажиллагааны байгууллага (ЕАБХАБ)-ын гишүүн орнуудынх юм. ЕАБХАБ-ын Ардчилсан институт хүний эрхийн газраас Монгол Улсын Их Хурлын 2024 оны ээлжит сонгуулийн үйл ажиллагааг ажиглах олон улсын шинжээч, мэргэжилтнүүдээс бүрдсэн өргөн бүрэлдэхүүнтэйгээр ажиглахаар хороо байгуулан ажиллаж байгаа бөгөөд нийслэл, орон нутаг дахь сонгуулийн үйл явцыг ажиглан олон улсын шаардлага, ардчилсан сонгуулийн зарчим, үндэсний хууль тогтоомжид нийцэж байгаа эсэхэд тайлан бэлтгэж, дүгнэлт, зөвлөмж өгнө. Ардчилсан институт хүний эрхийн газрын Сонгууль ажиглах хороо нь сонгуулийн үйл ажиллагааг эрх зүйн орчин, зохион байгуулалт зэрэг өргөн утгаар ажиглахаас санал авах байруудын бэлтгэл ажил, санал авах өдрийн нээлт, санал хураалт, санал тооллогын үйл явц, хяналтын тооллогыг ажиглана. Улмаар санал авах өдрийн дараа урьдчилсан тайлангаа танилцуулж, сонгуулийн үйл явцыг бүхэлд нь үнэлсэн урьдчилсан тайланг зөвлөмжийн хамт сонгуулийн үйл явц дууссанаас хойш хоёр сарын дараа нийтлэх аж. Сонгуулийн ерөнхий хороонд хүсэлтээ ирүүлсэн гадаад улс, олон улсын байгууллага, Монгол Улс дахь гадаад улсын Дипломат төлөөлөгчийн газрын 68 ажиглагч Монгол Улсын Их Хурлын 2024 оны ээлжит сонгуулийг ажиглах юм. УИХ-ын ээлжит сонгуулийн зохион байгуулалт дотоодод төдийгүй гадаад улсуудад бүрэн нээлттэй. Энэ удаагийн сонгуулийн гадаадын болон олон улсын хэвлэл мэдээллийн 12 (Kyodo News, CCTV, Bloomberg TV, Thomson Reuters, Schweizer Radio und Fernsehen, The Sankei Shimbun, Asahi Shimbun, Xinhua News Agency, Буриад ТВ, Nikkei, the Guardian, Agence-France-Presse) байгууллагын 27 сэтгүүлч, сурвалжлагч сурвалжилж, олон улсад мэдээлэхээр Гадаад харилцааны яаманд бүртгүүлж, үнэмлэх авчээ.

-НИЙТ 1341 НЭР ДЭВШИГЧ ҮНЭМЛЭХЭЭ АВСАН ДАГУУ ӨРСӨЛДӨЖ БАЙНА-

Монгол Улсын Сонгуулийн ерөнхий хороо, аймаг, нийслэл, сум, дүүргийн сонгуулийн хороо, хэсгийн хорооны гишүүд болон мэдээллийн технологийн баг, даамлаар ажиллаж буй 23.500 гаруй, иргэний бүртгэлийн итгэмжлэгдсэн ажилтан 2564, Цагдаагийн 12.000 гаруй албан хаагч, Онцгой байдлын 100 гаруй албан хаагч, нийтдээ 40 шахам мянган төрийн албан хаагчид хуулиар хүлээсэн чиг үүргээ биелүүлж, Та бүхний сонгох, сонгогдох эрхийг ханган санал авах ажиллагааг эхлүүлэхэд бэлэн болжээ. Түүнчлэн УИХ-ын ээлжит сонгуульд 19 нам, 2 эвслээс болон бие даан нэр дэвшсэн нийт 1341 нэр дэвшигч үнэмлэхээ авч, хуулийн хугацаанд сурталчилгаагаа хийж дуусгажээ. Тэдгээрийн 61.3 хувь нь эрэгтэй, 38.7 хувь нь эмэгтэй нэр дэвшигч байгаа нь хуульд заасан хүйсийн харьцааг хангаж байна.

-МОНГОЛ УЛСАД 2.224.233 СОНГОГЧ САНАЛАА ӨГНӨ-

Гадаад улсад байгаа иргэдийнхээ саналыг авахаар цахимаар бүртгэсний үр дүнд 13095 сонгогч бүртгүүлж, санал авах ажиллагааг анх удаа 4 өдөр зохион байгууллаа. Саналаа өгөхөөр бүртгүүлсэн иргэдийн 74.53 хувь нь саналаа өглөө. Улс орныхоо төлөө сонгох эрхээ эдэлж 500-1000 км явж саналаа өгсөн гадаад улсад байгаа сонгогчдодоо, санал авах ажлыг хариуцлагатай зохион байгуулжээ. Улсын Их Хурлын 2024 оны ээлжит сонгуулиар сонгогчийн нэрийн жагсаалтад бүртгэгдсэн нийт 2.224.233 иргэн саналаа өгнө. Нийт сонгогчдын 1.143.172 нь орон нутагт, 1.081.061 нь нийслэлийн сонгогчид байна. Эдгээрээс 16.259 сонгогч зөөврийн битүүмжилсэн саналын хайрцгаар санал өгөх хүсэлт гаргасан бөгөөд өнөөдөр 09.00-20.00 цагийн хооронд хэсгийн хорооны гишүүд батлагдсан хуваарийн дагуу саналыг нь авч байна.

Tumen.mn

СЕХ: Та өөрийнхөө төлөө,  хүүхэд, гэр бүлийнхээ ирээдүйн төлөө сонголт хийх хариуцлагатай цаг ирээд байна
СЕХ: Та өөрийнхөө төлөө, хүүхэд, гэр бүлийнхээ ирээдүйн төлөө сонголт хийх хариуцлагатай цаг ирээд байна
 
Т.Мөнхсайхан: Үнэтэй, чанаргүй эмийн асуудалд бодит өөрчлөлт хийнэ
Т.Мөнхсайхан: Үнэтэй, чанаргүй эмийн асуудалд бодит өөрчлөлт хийнэ