Ес дэх удаагийн парламент анхдугаар чуулганы хуралдаанаа хийж байна. Хуралдаанаар яг одоо шинээр сонгогдсон гишүүд тангараг өргөж байна. УИХ-ын гишүүн Ж.Алдаржавхлан дараах байр суурийг илэрхийллээ.
Тэрбээр, "Найман жил дамнан дүүрэгт ажиллаа. Тэр ч утгаараа ард түмний дунд хамгийн ойрхон ажилласан гэж өөрийгөө боддог. Ийм урт замыг туулж парламентад орж ирсэн хүний хувьд хамгийн түрүүнд “Хот байгуулалтын тухай хуульд өөрчлөлт оруулж, орон сууцны хотхон, хорооллын дунд сургуульгүй барьдгийг зогсооё” гэсэн зорилттой байна.
Бид энд, тэндгүй баахан байшин бариад байдаг гэхдээ ямар ч сургууль, цэцэрлэггүй баригддаг шүү дээ. Тийм учраас үүнийг хуульчилж, таслан зогсоохгүй бол энэ асуудал улам хүндэрнэ.
Миний сонгогдсон Хан-Уул дүүрэгт 4000-5000 айлын орон сууц баригдаж байгаа. Тэгснээ ямар ч сургууль, цэцэрлэг байхгүй байгаад байна. Тийм болохоор стандарт гэдэг зүйлийг тогтоож өгөх нь зөв учраас энэ тал дээр ажиллахаар шийдсэн байгаа” гэлээ.
