Өнөөдөр (2024.09.02) хот, дүүрэг, аймаг, сумдын иргэдийн төлөөлөгчдийн хурлын төлөөлөгчдийн сонгуульд өрсөлдөгчдийн нэрс тодорно. Эдгээрээс жин, нөлөөллөөрөө УИХ-ын сонгцуулийн дараа эрэмбэлэгдэх нь НИТХ-ын төлөөлөгч сонгох сонгууль.
НИТХ-ын төлөөлөгчдийн мандат 45. Голлох өрсөлдөөнд АН, МАН орох бөгөөд төв намаас удирдах чиглэлээ авч, төв цэгээ нийслэлийн намын хороод дээрээ зангидах юм. МАН-ын нийслэлийн хороог Х.Нямбаатар, АН-ын хотын намын хороог Т.Батцогт нар удирдаж буй.
Үндсэндээ эл хоёр эрхэм НИТХ-ын төлөөлөгчдийн сонгуулийг хотод удирдаж ажиллана гэсэн үг. Нэг нь хотын даргын албан тушаалтай. Тэрбээр УИХ-ын гишүүн, сайдын албан тушаалаасаа өөрийн хүсэлтээр түдгэлзэж, хотын дарга болсон.
Харин нөгөө талд АН-ын хотын намын хороог удирдах Т.Батцогт нь нийслэлд төлөөлөгчөөр улиран сонгогддог, бүтцээс нь өгсөж яваа нэгэн. Гэвчиг УИХ-ын сонгуульд хоёр удаа унаж, энэ жил дахин НИТХ-д өрсөлдөх юм.
Хотын дарга Х.Нямбаатар "20 минутын хот" нэршил бүхий МАН-ын мөрийн хөтөлбөрт тусгагдсан үзэл санааг нийслэлийн явж өгдөггүй угжирмал ажлуудыг шууд шийдэж буй "ажилсаг" дүрээр сонгуулиа удирдах чигтэй байна. Харин Т.Батцогт хотын асуудлыг сөрөг хүчний нүдээр харж, мэтгэлцээний байдлаар шийдэл ярих хүлээлт байна.
Тэдний ярих ажил хэрэг, үзэл санаа, шийдлээс гадна хэн хэнийг НИТХ-ын төлөөлөгчдийн уралдаанд гүйлгэх үү. Тэдгээр нэрс хэр өрсөлдөхүйц боломжтой дүрүүд байх уу гэдгээс сонгуулийн дүн ихээхэн хамаарахаар байна. Тэгэхээр Х.Нямбаатар ч, Т.Батцогт ч 45 нэрсдээ ихээхэн хянамгай хандаж, төв намын лоббиг бага оруулах, бие даасан эрх мэдлээ хэрэгжүүлэх амбицаа хадгалсаар байна.
Тэд нэрсээ яг өнөөдөр буюу 2024.09.02-ны өдрийн 00:00 цаг дөхүүлж зарлана. Энэ хүртэл намын дээд шат, хотын гишүүд зэрэг субьектуудтай зөвлөх, нэрсээ жигдлэх зэрэг далд лоббины ажлууд хөшигний ард өрнөх юм.
