Нийслэлчүүдийг чанартай, хямд үнэтэй махаар хангах гэж маш том ажил байдгийг үе үеийн хотын удирдлагууд мах, ясандаа тултал мэднэ. Тиймээс Хотын ерөнхий менежер Ц.Төрхүү ирэх хавар, зун хэрэглэх махны нөөцийг бэлтгэх талаар махны компанийн удирдлагуудтай уулзахын зэрэгцээ талархал илэрхийлэв. Учир нь 2023 онд компаниудын бэлтгэсэн мах маш чанартай байсан учраас өнгөрөгч хавар махны үнэ тийм ч өндөр аваагүй юм байна.
Түүнчлэн нийслэлээс иргэдэд хямд, чанартай мах нийлүүлэхийн тулд энэ өвөл компаниудтай хамтран, “Идэш” нэртэй арга хэмжээг зохион байгуулж, шууд малчны хотноос мах бэлтгэх төлөвлөгөө ч байгаа бололтой.
Энэ үеэр Хотын ерөнхий менежер Ц.Төрхүү махны компанийн удирдлагуудад хандан, “Бидний уулзалт нэг удаагийнх биш, олон удаа уулзаж байж үр дүн гарна. Төр хувийн хэвшлийн түншлэлийн хүрээнд ажлаа явуулах ёстой. Энэ жилийн хавар зарсан мах маш сайн байсан. Энэ бүхэн та бүхний ажлын үр дүн. Гагцхүү баглаа, боодол нь болохгүй гэх шүүмжлэл гарсан. Тиймээс манай компаниуд бидэнтэй хамтраад үүнийгээ сайжруулах хэрэгтэй. Нийслэлийн зүгээс анхны үнийг санал болгож байна. Хэдүүлээ тал талаасаа үнэ, нөхцөл байдлаа судлаад эргээд уулзъя. Та бүхэн үнэгүйдээд байгаа дайвар бүтээгдэхүүнээ мөнгө болго. Хэрвээ та бүхэн хүсвэл би дайвар бүтээгдэхүүний зах гаргаж өгч болно. Иргэдийн хэрэгцээнд таарсан энэ мэт зүйл хаа хаанаа хэрэгтэй. Хэдүүлээ эхийг нь эцээхгүй, тугалыг нь тураахгүй зүйл хийе. Миний хувьд улаанбаатарчуудад хямд, чанартай мах нийлүүлэх үүрэгтэй хүн” хэмээв.
Тэрбээр энэ удаагийн уулзалтаар ямартай ч махны компанийн захирлуудтай анхан шатны тохиролцоо хийсэн гэж болохоор харагдана. Өөрөөр хэлбэл Ц.Төрхүү дарга махны компанийн захирлуудыг “найрав”.
Урьд өмнө нөөцийн мах бэлтгэх ажил өвлийн сард эхэлж, хугацаа давчуу учраас хаана хэнд, аль компанид ямар ч хамаагүй махыг авч нөөцөлдөг байсан нь маргаан дэгдээх үндэслэл болдог байсныг нийслэлчүүд мэднэ.
Харин энэ удаад халуун намраар яриа хэлэлцээрт орж байгаа нь улаанбаатарчууд ирэх хавар ямартай ч өлсөхгүйгээс гадна маргаан дэгдэхгүй байх магадлал өндөр байна.
Tumen.mn
