Нүүрсний гэх тодотголтой 11 хүнд холбогдох хэргийн давж шатны шүүх хурал өнөөдөр/2024.09.12/ хоёр дахь өдрөө үргэлжилж байна. Шүүх хурал нийслэлийн Давж заалдах шатны шүүхийн байранд өглөө 09.00 цагт эхэлжээ. Шүүх хурлын эхний өдөр шүүгдэгч нар болон өмгөөлөгчдийн давж заалдах гомдлоо танилцуулснаар хаалттай хэлэлцсэн гэдгийг албаныхан мэдээлсэн.
"Нүүрсний" гэх хэрэгт холбогдон гэм буруутай нь тогтоогдож, Анхан шатны шүүхээс Т.Аюурсайхан 3 жил хорих ял, Б.Ганхуягт 5.9 жил хорих ял оноож, мөн торгуулийн ялаар шийтгэсэн байдаг.
Түүнчлэн Т.Аюурсайханаас 1.8 тэрбум, Б.Ганхуягаас 9.9 тэрбум төгрөгийг хурааж, улсын төсөвт шилжүүлэхээр болсон.
Тэгвэл тэдэнтэй холбоотой давж заалдах шатны шүүх хурал өчигдөр /2024.09.11/ 18 цаг хүртэл үргэлжилж завсарласан. Өнөөдөр үргэлжилнэ. Өчигдрийн тухайд Т.Аюурсайхан, Б.Ганхуяг болон тэдний хамаарал бүхий есөн хүн цагаатгуулах хүсэлт гаргажээ.
