Манай улс жижүүр Ерөнхий сайдтай. Нутагтаа жижүүр хийж явсан жигтэйхэн уярам намтартай нэгэн. Азийн хүлэг улс гээд аймаар гоё номны реклам цацаж байгаад аятайхан “ороод” ирсэн хүн. Таван шударгын нэгийн дүрийг дурлатал бүтээж, тун ч удалгүй дээш цойлсон эрхэм. Хожим нь шувуу, шүүр, шулам билүү Ш-ээр эхэлсэн ажиллагаанууд эхлүүлж, Т.Бадамжунайг авчруулсан ч одоо хүртэл яаж ч чадахгүй суугаа нэгэн.

Сүүлийн үед Ерөнхий сайдыг ганцаардаж байна гэх юм. Бүтэн кабинет өөрөө байгуулчихсан хүн юундаа ганцаарддаг юм бол? Уярал хайрын түүхээр бол урсгаж өгөхөөр залуу л даа. “Харц” нэвтрүүлгийг хөтлөөд харайлгаж явсан насыг нь бодоод ингэж хэлэв.

Одоо Ерөнхий сайд маань 14 мега төсөл гэх үнэн гоё үг олчихсон яваа. Үгэн дотор нь үнэн байгаа эсэхийг хэлэхэд бэрх. Бэрхэд жижүүр байсан гэдэг нь үнэн эсэхэд нь эргэлздэгтэй яг адилхан. Ерөнхий сайдын маань Хүлэг улс үнэндээ бол гуниг, гамшиг нүүрлэсэн газар. Утаанд урдахаа харахгүй алхах хүүхдүүд, уушги нь маргаашаа даахгүй болсон ахмадууд, үгээ хэлж ч чадахгүй болсон өрөвдөлтэй ноомой хүмүүс. Утаанаас хамгаал гээд яндан шахсан ч угаартаж түүнд нь хэдэн зуугаараа амиа алдана.

Хүрэн царайтай, хүдэр дуутай, У.Хүрэлсүх Ерөнхийлөгч өчигдөр Сайд нарыг дуудаж, үүрэг даалгавар буулгажээ. Гэтэл Ерөнхий сайд маань очсонгүй. “Нүүрсний утаа, хариуцлагагүйн утаа хоёр нийлж халаад Улаанбаатарыг бүрхэж байна. Явж, явж найрааны Засгийн газар болох юм байна. Хазаараа татаж, ажлаа хийцгээ!” гэж сайд нарт хэлсэн Ерөнхийлөгчийн сүртэй үгс Уильям Шекспирийн зохиолтой уран яруугаараа уралдан эгшиглэхэд Ерөнхий сайд маань ойроос сонсож чадсангүй.

Дарга нар яахав дээ, гэр бүл нь Улаанбаатарт өвөлжихгүй шүү дээ, Тайланд, Сингапур, Вьетнам гээд дулаан газар өвөлжчихөөд дулаан орохоор хүрээд ирнэ. Бид мэтийн онгоцоор нисэх байтугай такси ч барьж дийлэхээ больсон түмэн түгжрэлдээ амьдарч, автобусаа хүлээнэ. Үнэндээ бол автобус биш аятайхан амьдрал л хүлээгээд байгаа юм.

Эрхэм Ерөнхийлөгч маань Ерөнхий сайд байхдаа таавчигтай бүсгүй эмнэлгээс гарснаас болоод хариуцлагаа ухамсарлан огцорч байлаа. Одоо гэтэл энэ их хорт утаанаас хорт хавдар үүсэж буйг Чинбүрэн гишүүн чин сэтгэлээсээ хэлээд зарлаад байхад Ерөнхий сайд “Би чадсангүй ээ” гээд огцорчихдоггүй юм байх даа. Заавал нүднийх нь өмнө хэн нэгний хоолой боогдож, уушги нь устах ёстой юм болов уу? Ард түмэн ноомой байж болно оо. Гэхдээ ард түмэн тэнэг биш. Өвдөж буйн учир, эдгэхгүй байгаагийн шалтгаанаа ард иргэд арьс мах, бие организмаараа мэдэрч, мэдэж байгаа. Ойлгож байгаа. Аливаа юм хэтрээд ирэхэд хувьсгал гарч, бүгдийг өөрчлөн шийддэг жамтай. Ард олноо хэт басамжлан, намаржингаа бродюр солиод, хар утаан дундаас хазгай өрсөн бродюр нь гялтганах улсын нийслэлээ, утаат Улаанбаатараа, биднийг боддоггүй юм гэхэд ядаж, энд ирэх тэр гадаадын эрхэм зочдоо хүлээж авахдаа нүүр нь улаймаар юм даа.

“Гурван жил утаагүй байж чадсан хэрнээ одоо яагаад ийм болчихов оо?” гэж Ерөнхийлөгч сайд нараас асуужээ. Цахилгааны үнэ нэмчихээд ард түмнийхээ өмнө гарч ганц үг ганхийлгүйгээр Арабад айлчилж явсан эрхэм Ерөнхий сайд Л.Оюун-Эрдэнэ үүнд хариулт хэлсэнгүй. Учир нь очоогүй юм чинь. Ноёдын үхэл хуралд, нохойн үхэл жалганд гэж...Хуралдаа ирээгүй Ерөнхий сайдыг хуу татаж хаях гэнэ ээ... гэх бор шувуу хаа сайгүй нисэж эхэллээ. “Тавантолгой түлш компани “Та нар хатаалт хийхгүй байгаа. Миний сонссоноор шахмал түлш 13 хувийн чийгшилтэй байна" гэсэн.Түлшнийхээ чанар дээр онцгой анхаар. Барьцалдуулагч нь хоёр янз байгаа. Зохион байгуулалтаа сайн хий. Ажил хийдэггүй арчаагүй гаруудаа зайлуул.Цагдаа, тагнуулын дарга нар энэ дээр хэн нэг хүний толгойг илээд байх шаардлагагүй.Агаар орчны бохирдлыг бууруулах үндэсний хороо татан буугдсан. Хоёрдугаарт, мэргэжлийн хяналтын байгууллага татан буугдсан.Өнөөдөр хотын захиргаа, Тавантолгой түлш компанид нүүрсний утаа, агаарын бохирдлыг даалгаж хаячхаад хэзээ ч амжилтад хүрэхгүй. Тиймээс Улсын онцгой комиссыг яаралтай хуралдуул” хэмээн Ерөнхийлөгч мэдэгджээ.

Харин Ерөнхий сайдыг Өмнөд Солонгост хамрын хагалгаанд орлоо гэж баттай бус эх сурвалж бичсэн байх юм. Ерөнхийлөгч утаатай тэмц гээд байхад Ерөнхий сайд маань тэнд буруу ойлгоод хамартаа утааны шүүлтүүр тавиулсан юм биш байгаа даа. Мэдэхгүй юм даа, Онцгой комисс хуралдаж, утаанаас мөнгө идсэн олон эрхмийг илчиллээ гэхэд ажлын чадвар мэдлэггүй, нам дагасан мануухайнуудаар дүүрсэн энэ төр засаг юм хийж чадна гэж үү? Таавчигтай олон эмэгтэй талбай дээр гарвал танай кабинет тарах уу, Ерөнхий сайд аа!

Эх сурвалж: Tumen.mn