Олон улсын “Oxfam” байгууллага Швейцарын Давос хотноо даваа гарагт эхэлсэн Дэлхийн эдийн засгийн чуулга уулзалтыг угтан нийгмийн тэгш бус байдлын тухай жил тутмын "Takers not Makers" тайлангаа нийтэлжээ.

Тайланд дурдсанаар, өнгөрсөн онд дэлхий даяар өлсгөлөнд нэрвэгдсэн хүмүүсийн тоо 733 саяд (2019 оныхоос 152 саяар өссөн) хүрсэн бол тэрбумтнуудын тоо 204-өөр нэмэгдэж, 2769 болжээ.

Тэрбумтнуудын хөрөнгийн хэмжээ 2023 онд нийлээд 13 их наяд ам.доллар байсан бол өнгөрсөн онд 15 их наяд ам.доллар болж өссөн байна. "Энэ нь дэлхийн тэрбумтнуудын нийт хөрөнгө өнгөрсөн онд өмнөх оныхтой харьцуулахад гурав дахин хурдан өссөн гэсэн үг юм" гэж “Oxfam”-ын тайланд дурджээ. Тэрбумаар хэмжигдэх хөрөнгөтэй хүн бүрийн хөрөнгө өдөрт дунджаар хоёр сая ам.доллароор, харин хамгийн чинээлэг 10 хүний хөрөнгө өдөрт 100 сая ам.доллароор нэмэгдсэн бол долоо хоног тутамд бараг дөрвөн тэрбумтан шинээр “төржээ”.

“Oxfam” байгууллагын шинжээчид тайлангаа гаргахдаа янз бүрийн эх сурвалжийн мэдээлэлд үндэслэжээ. Тухайлбал, “Forbes” сэтгүүлийн тэрбумтнуудын хөрөнгийн талаарх мэдээллийг Дэлхийн банк болон “UBS World Wealth Report” тайлангийн дүгнэлттэй харьцуулан нэгтгэсэн байна.

Хэрэв тэгш бус байдлыг арилгасан бол үгээгүй ядуурлыг гурав дахин хурдан ялах байлаа гэж "Oxfam"-ын тайланд дурдсан байна. Тайланд мөн "дэлхийн эдийн засагт шударга байдлыг бэхжүүлэхийн тулд зоригтой шийдвэр гаргахыг" уриалжээ. Өнгөрсөн онд хамгийн олон тэрбумтантай улсуудын жагсаалтыг АНУ тэргүүлж, Хятад, Энэтхэг улсууд удаалжээ.

Д.Жаргал

Эх сурвалж: "Монцамэ" агентлаг