Аливаа аюулын өмнөөс сөрж зогсдог онцгой байдлын алба болон төрийн албаны тусгай чиг үүргийг хэрэгжүүлдэг алба хаагчид үүрэг гүйцэтгэх явцдаа гэмт халдлагад өртөх, амь насаа алдах тохиолдол цөөнгүй байдаг. Тиймээс Гэр бүл, хөдөлмөр, нийгмийн хамгааллын сайд Л.Энх-Амгалан онцгой байдлын салбарт хөдөлмөрийн аюулгүй байдал, эрүүл ахуйн тухай хуулийн хэрэгжилтийн улсын үзлэг зохион байгуулахаар болжээ. Үүгээрээ тус салбарт эрүүл, аюулгүй орчинг хэрхэн ханган ажиллаж байна, аюулын өөдөөс сөрөн ороход ямар арга хэмжээ авч байгаа зэрэг бүхий л тал дээр хууль, эрх зүйн орчинтой нь уялдуулан анхаарах юм байна. Энэ бол чухал зүйл.

Өнгөрөгч онд тус яамнаас төрийн тусгай чиг үүргийг хэрэгжүүлэгч байгууллагуудад албан хаагчдын амь нас, эрүүл мэндийг хамгаалах, эрүүл аюулгүй ажлын байрыг бий болгох, хөдөлмөрийн аюулгүй байдал, эрүүл ахуйн хууль тогтоомжийн хэрэгжилтийг хангуулах, үйлдвэрлэлийн осол, хурц хордлого, мэргэжлээс шалтгаалсан өвчлөлөөс урьдчилан сэргийлэх зорилгоор албан даалгавар хүргүүлсэн байдаг.

Уг хуулийн хэрэгжилтийн үзлэгийн гол зорилго нь Онцгой байдлын ерөнхий газрын харьяа газар, хэлтэс, анги, салбаруудад хөдөлмөрийн аюулгүй байдал, эрүүл ахуйн хууль тогтоомж хэрхэн хэрэгжиж байгаад үнэлэлт, дүгнэлт өгч цаашид авах арга хэмжээний талаар санал боловсруулах юм. Тус үзлэг нь орон даяар 2025 оны нэгдүгээр сарын 27-ны өдрөөс нэг сарын хугацаанд үргэлжлэх бөгөөд ХХҮЕГ, аймаг, дүүргийн хөдөлмөрийн эрүүл ахуйн хяналтын улсын байцаагчид, Онцгой байдлын ерөнхий газрын харьяа газар, хэлтэс, гал түймэр унтраах, аврах, эрэн хайх аврах анги, салбарууд хамтран ажиллах ажээ.