УИХ-ын гишүүн асан Б.Энх-Амгалан, Ерөнхийлөгчийн Тамгын газрын дарга асан З.Энхболд нарт холбогдох хэргийн шүүх хурал өнөөдөр /2025.02.05/ гурав дахь өдрөө үргэлжилж байна.

Шүүх хурал өглөөний 09.00 цагт эхлэх байсан. Гэвч хурлын шууд дамжуулалт 10:00 цагт эхэллээ. Өнөөдрийн хурлаар шүүгдэгч болон өмгөөлөгч нарын эцсийн үгээ хэлж байна.

Шүүгдэгч Б.Энх-Амгалан эцсийн үгээ хэллээ.

Тэрбээр, “Би та бүхэнд итгэсэн. Шалгаад үнэнийг нь гаргана гэж итгэсэн ч тийм зүйл болсонгүй. Анх нүүрсний хулгайч гэж зохиол бичсэн. Тэр нь бүтээгүй. Бид хоёрын энэ хэргээр их олон хуулийн байгууллага кейс бичнэ. Анх бид хоёрыг нүүрсний хулгайн хэрэгт холбосон. Тэр нь бөөн юм болж хэвлэлээр явсан. Манай хүүхэд хичээлдээ явж чадахаа байгаад “танай аав нүүрсний хулгайч юм чинь. Хулгайлсан мөнгөөрөө бидэнд хоол авч өг” гэж уйлаад орж ирсэн. Тийм аймар нөлөөтэй юм байна лээ. Тэгээд сүүлдээ З.Энхболд, Б.Энх-Амгалан гэж эрт урьд эмгэн өвгөн хоёр байжээ гэдэг шиг. Энхболд гэдэг хүн Б.Энх-Амгалангийн ах нь юм байна. З.Энхболд дүүгээ УИХ-ын гишүүн болгож гэнэ. Дараа нь төрийн сайдаар тавьжээ. Түүнд нь дүү нь ач санаад ах З.Энхболдод зам өгчээ гэдэг үлгэр зохиосон. Яг үүнийх нь дараа АТГ хуралдаад гэмт хэрэгт холбогдсон гээд зарлачихсан. Би яллах дүгнэлттэйгээ танилцаагүй байхад тэр талаар хэвлэлээр гарсан. Ингэж болдог юм уу. Нийгмээр яллуулаад шүүхээр нөлөөлөх гээд байдаг. Энэ худлаа биш шүү. Ингэж явсны мөрөөр сүүлдээ би нийгэмд хав хар хүн болж хувирсан. Гэрчүүдийн мэдүүлэгт байгаа баримтаас нотлогдоогүй мэдээлэлд тулгуурлан хэргийг шүүхэд шилжүүлсэнд би үнэхээр гомдолтой байна.

Энэ шинэ цагийн хэлмэгдүүлэлт үү. Төрийн сайд болгон хуульд нийцүүлж гаргасан тушаалынхаа төлөө хэрэгтний ширээн дээр суугаад байвал энэ улсад хэн ажил хийх юм бэ. Энэ монгол төрийн төлөө хэн тангараг өргөж түүнийхээ төлөө явах юм. Төр, ард түмний төлөө өргөсөн тангарагтаа үнэн ч байж элдэв улс төрийн болоод эрх ашгийн хуйвалдаанд оролцолгүй явсан хүн би. Би төрд гурван удаа тангараг өргөсөн. Тэгж тангарагтаа үнэн явсандаа баярлаад сууж байна.

Би бас цол бүртгэлтэй офицер хүн. Би бас хэрэг бүртгэл мөрдөн байцаалт явуулж байсан. Гэхдээ ингэж явуулж байхыг анх удаа харж байна. Нөгөө талаас хийгээгүй хэргийнхээ төлөө хэрэгтний сандал шүүгдэж дээр сууж байхдаа “Монгол төр зүтгэсэн хүндээ халтай байдаг юм байна” гэдэг үг яг ийм үед гардаг юм байна гэж бодлоо. Хэрэв яг үүгээр ял аваад явбал Монголын бүх сайд нар хуульд нийцүүлж гаргасан шийдвэрийнхээ төлөө нэг гэрчийн мэдүүлгээр хэрэгт орох юм байна шүү гэдгийг анхааруулж хэлье” гэлээ.