Өдгөөгийн УИХ-ын дарга Засгийн газрын хэрэг эрхлэх газрын дарга байхдаа Гаалийн албан татвараас чөлөөлөх тухай хуулийг өргөн барьж, эрх мэдлээрээ “хүчиндэж” батлуулсан гэдэг. Үүний улмаас тариалан эрхлэгчид маань маш хүнд байдалд ороод байгаа учраас Хүнс, хөдөө аж ахуй, хөнгөн үйлдвэрийн сайд Ж.Энхбаяр УИХ-ын чуулганы хуралдаан дээр байр сууриа илэрхийллээ.

Тэрбээр “Монгол Улсын стратегийн бүтээгдэхүүн болсон улаан буудайгаа 100 хувь хангах нөхцөл 100 хувь бүрдсэн. Өнгөрөгч 2024 онд гэхэд 386 мянган тонн буудай хураан авч, үүнээс хүнсний чиглэлд 210 мянган тонныг нийлүүлсэн юм. Үүний зэрэгцээ өнгөрөгч өвөл болсон зудны улмаас Гаалийн албан татвараас чөлөөлөх тухай хуулийг батлуулсан нь газар тариалангийн салбарынханд маш том цохилт болсон. Салбарын маань үзүүлэлт 60 хувь унаж, 40 хувийн импортын хамааралд орсон. Одоо хаврын тариалалт эхлэнэ. Тавдугаар сарын 1-нд тариалалт эхлэхээс өмнө асуудал шийдэгдэхгүй бол нөхцөл байдал улам хүндэрнэ. Хуулийг өөрчлөн батлахгүйгээр цаашид газар тариалангийн салбарын хөгжил ярих боломжгүй. Эрхэм гишүүд минь энэ асуудалд нэг анхаарал хандуулж өгөөч ээ” хэмээсэн юм.

Дашрамд дурдахад Гаалийн албан татвараас чөлөөлөх тухай хуулиас үүдэн, импортын цементийн татварыг 20-иос таван хувь болгон бууруулсан. Тиймээс Хөгжлийн банкнаас зээл авч хөл дээрээ боссон “МАК”, “МОН” тэргүүтэй цементны үйлдвэрүүд үүд хаалгаа барьж, олон хүн ажилгүй суухад хүрчээ.

Уг нь Монгол Улс өөрсдөө гурил болон цементийн дотоодын хэрэглээг 100 хувь хангах боломж нөөц хангалттай атал эсрэгээрээ төрөөс импортын хаалгыг нээсэн шийдвэр нь үндэсний үйлдвэрлэгчдээ татаж унагаах, бизнес эрхлэгчдийг баялаг бүтээх хүсэлгүй Монголоос дүрвэтэл хорлосноос өөрцгүй боллоо. Мөн гурил импортоос авахын тулд хэдэн төгрөгөө валютаар солих болов. Гурилыг гаалийн татвараас чөлөөлснөөс хойш 10 сарын хугацаанд гурилын импорт 5.8 мянган тонноос 63.5 мянган тонн болтол өсчээ.

Tumen.mn