Дэлхийн цэнгэг усны нөөцийн 0,4 хувь, Монгол Улсын гадаргын усны нөөцийн 74.6 хувийг дангаараа эзэлдэг Хөвсгөл нуур бол монголчуудын хувьд чандмань эрдэнэ билээ. Тиймээс Монгол Улсын Ерөнхийлөгч У.Хүрэлсүхийн санаачилга дор “Хөвсгөл нуурыг хамгаалах цогц ажил” өрнүүлээд байгаа билээ.

Харин энэхүү ажлын хүрээнд талуудын зөвлөлдөх хурлыг зохион байгуулсан юм. Тус хуралдааныг Ерөнхийлөгчийн Тамгын газрын Байгаль орчны төсөл, хөтөлбөр хариуцсан албаны дарга О.Алтансаруул ахалж , Ойн газар, Усны газар, Хөвсгөл аймгийн удирдлагууд, Хөвсгөл нуур орчмын таван сумын Засаг дарга, мөн Тогтвортой аялал жуулчлалыг хөгжүүлэх төслийн багийнхан оролцлоо.

Хуралдаанаар Хөвсгөл нуурын ойн санг хамгаалах ажлыг эхлүүлэх, Хатгал- Жанхай чиглэлийн хатуу хучилттай автозамын ажлыг эрчимжүүлж энэ жил дуусгах, Хөвсгөл нуурын эрэг орчмын амралтын газруудад хяналт шалгалт хийж, стандарт мөрдүүлж, эргийн дахин төлөвлөлт хийх зэрэг ажлыг хэлэлцэн шийдвэрлэсэн. Мөнхүү Хөвсгөл нуураас усны дээж авах цэгийг нэмэгдүүлж тогтмол лабораторийн шинжилгээнд хамруулах, Хөвсгөл нууранд усан замын тээвэр эрхэлдэг бүх завинд хяналт шалгалт хийж, стандартыг мөрдүүлэх, Хөвсгөл нуурыг хамгаалах үндэсний чуулганаас гаргасан зөвлөмжийн хэрэгжилтийг хангуулах зэрэг олон ажлыг хийхээр тус тус шийдвэрлэлээ.

Ерөнхийлөгч У.Хүрэлсүх Ерөнхий сайдаар ажиллаж байхдаа “Хөвсгөл нуурын бохирдлыг бууруулах талаар авах арга хэмжээ”-ний тухай 117 дугаар захирамж баталсан байдаг. Хөвсгөл нуурт 1950 оноос хойш Ханх, Хатгал чиглэлийн шатахуун, бараа тээвэрлэж байсан 50 гаруй авто машин живсэн. Эдгээр 50 гаруй авто машин техник хэрэгслийг гаргаж авахгүй бол их хэмжээний шатахуун нь асгарч, Хөвсгөл далайг бүхэлд нь бохирдуулах том эрсдэл үүссэн байснаас сэргийлэн нуураас машин техникийг татаж гаргасан юм. Ийнхүү цэнгэг уст Хөвсгөл нуурыг хамгаалах цогц ажил үргэлжилсээр байна.

Tumen.mn