ЦЕГ-ын Хар тамхитай тэмцэх газраас өнөөдөр хар тамхитай холбоотой гэмт хэргийн талаар мэдээлэл хийлээ. Тус газрын УСХА хэлтсийн дарга Цагдаагийн хурандаа Б.Батхуяг “Монгол Улсын иргэн гадаадын иргэнтэй хамтарч мансууруулах үйлчилгээтэй бодисыг Монгол Улсын хилээр хууль бусаар нэвтрүүлж, бусад худалдан борлуулж байна гэдэг мэдээллийн дагуу шалгалтын ажиллагаа явуулж, гэмт этгээдийг баривчилж, шалгалтын ажиллагаа явуулахад 510 грамм мансууруулах үйлчилгээтэй бодисыг хурааж авсан. Уг бодис нь сэтгэц нөлөөлөх үйлчилгээтэй бодис байсан. Уг этгээдэд нь хар тамхитай тэмцэх газарт гадуур шалгагдаж байхдаа дахин гэмт хэрэг үйлдсэн тогтоогдсон.

Мөн Монгол Улсын дөрвөн иргэн ОХУ-аас Сэлэнгэ аймгийн Алтанбулагийн хилийн боомтоор их хэмжээ мансууруулах үйлчилгээтэй эмийг нэвтрүүлж, нийслэлд оруулж ирсэн. Эдгээр этгээдүүдийг баривчилсан. Эдгээр иргэдэд таслан сэргийлэх арга хэмжээ авсан. Уг эмийг эмчийн энгийн жороор олгогдог. Тухайн эмийг хүүхэд залуучууд мансууруулах зорилгоор хэрэглэдэг. Хоногт нэгээр хэрэглэдэг эмийг олон ширхгээр тарианы ус найруулж судсаар тарьж мансуурч байна.

Энэ төрлийн гэмт хэрэг 2022 оноос эхэлж үйлдэгдэж эхэлсэн. Одоогийн байдлаар өсвөр насны 13 хүүхэд нас барсан. Мөн 40 гаруй хүүхэд гар, хуруугаа тайруулсан. Ийм хор аюултай зүйлийг иргэд хууль бусаар борлуулж байна.

Сүүлийн жилүүдэд цагдаагийн газар болон хар тамхи тэмцэх газраас олон хэргийг илрүүлж, их хэмжээний бодисыг хурааж авч байна. Хар тамхитай тэмцэх газарт шалгагдаж байгаа, шүүхээр ял шийтгэл авч байсан этгээдүүд хар тамхитай тэмцэх газрын алба хаагчдыг гүтгэх нэр хүнд халдах тохиолдол нэлээд гарч байна. Тухайлбал, Хар тамхитай тэмцэх газрын алба хаагчид хураасан бодисоо худалдаалдаг, хэрэглэдэг гэсэн мэдээлэл гарч байгаа. Хар тамхитай тэмцэх газрын алба хаагчид улиралд бүр мансууруулах бодис хэрэглэсэн байна уу гэдгийг шалгадаг.

Мансууруулах бодисыг прокурорын хяналтад дор устгалд оруулдаг. Энэ оны нэгдүгээр улиралд шүүхээр эцэслэн шийдвэрлэсэн 151 хэргийн эд мөрийн баримтыг устгалд оруулсан. Тухайлбал, мөс гэх нэршилтэй бодис 249 грамм, канабис төрлийн ургамал 48 кг, 138 ширхэг мансууруулах үйлчилгээтэй эм, зүү дуслын системийг шатаах аргаар устгалд оруулсан” гэв.