Нийслэл хотын төв талбайд "UB food" хоолны өдөрлөг хоёр дахь өдрөө үргэлжилж байна. Эхний өдөр хоолны асраар 10,000 орчим иргэн үйлчлүүлж узбек тогооч нарын пловыг амталжээ.

Өдөрлөгийн зохион байгуулалтын талаар Улаанбаатар хотын ерөнхий менежер Г.Батзориг "UB food" хоолны өдөрлөгийн эхний өдөр буюу дөрөвдүгээр сарын 8-нд зохион байгуулалтын алдаа гаргасан. Өнөөдөр иргэдэд бухимдал төрүүлэхгүйгээр түргэн шуурхай хоолоо түгээхээр плов, самса, кебаб, шорлогийг тус тусад нь салгаж, үйлчлэх зохион байгуулалтад орж байна. Эхний өдөр эдгээр хоолыг нэг дороос түгээж дэндүү их оочер үүсгэсэн. Өчигдөр 10,000 орчим иргэн узбек хоолоор үйлчлүүлсэн бөгөөд бидний тооцоолж байснаас хоёр дахин их хүн ирлээ

Өнөөдөр 12:30 цагийн байдлаар плов бэлэн болсон бол 13:00 цагаас самса, казань кебаб, 14:00 цагт шорлог гарч байна. Төв талбайн асарт 5,000 төгрөгийн төлбөр төлж ороод бүх хоолноос амсчихвал гарч болно, хөөхгүй. Өчигдөр орой хоолгүй байсан бол өнөөдөр 21:00 цаг хүртэл хоолоор үйлчлэхээр ажиллаж байна. Гурван ААН пиво худалдаалж байгаа. Гандангийн гурилтай шөлийг 800 литрийн багтаамжтай тогоонд хийх бөгөөд маргааш/2025.04.10/ гарна" гэж мэдээллээ. "UB food" хоолны өдөрлөг дөрөвдүгээр сарын 14-нийг дуустал өдөр бүр 12:00 цагаас нээгдэх юм байна. Хотын ерөнхий менежерийн мэдээлснээр "UB food" хоолны өдөрлөгийн эхний өдөр 50 сая төгрөгийн орлого төвлөрчээ. Харин өдөрлөгийг зохион байгуулахад хэдэн төгрөгийг зарцуулсан талаар НЗДТГ-аас өнөөдөр 15:00 цагт мэдээлэл өгөхөөр товложээ. Өдөрлөгийг зохион байгуулахад 1.6 тэрбум төгрөг зарцуулсан гэх мэдээлэл гараад байгаа аж.