Монгол Улсад Авто тээврийн салбар үүсэж хөгжсөний түүхт 100 жилийн ой энэ онд тохиож байгаа билээ. Үүнтэй холбогдуулан Баянхонгор аймгийн Автотээврийн төвөөс "4х4 хаврын бартаат замын тэмцээн"-ийг дөрөвдүгээр сарын 19, 20-нд зохион байгуулсан байна.

Энэ талаар Баянхонгор аймгийн Автотээврийн төвийн дарга С.Батцэрэн дараах мэдээллийг өгөв. Тэрбээр "Манай аймагт анх удаа Хово кросс буюу хүнд даацын ачааны машины бартаат замын уралдаан өнгөрсөн долоо хоногийн амралтын өдрүүдэд амжилттай зохиогдсон. Урьд нь Монгол Улсын хэмжээнд хүнд даацын ачааны машины бартаат замын уралдаан зохион байгуулагдаж байгаагүй . Энэ уралдаанд манай аймагт тээврийн үйлчилгээ эрхэлдэг 26 жолооч хүнд даацын машинтайгаа оролцсон. "4х4 хаврын бартаат замын тэмцээн" нь хот хооронд зорчдог ачаа тээврийн болон автобусны уран жолоодлого, 4х4 УАЗ машин уралдаан, Хово кросс гэсэн үндсэн дөрвөн ангиллаар зохиогдлоо.

Монгол Улсад Авто тээврийн салбар үүсэж хөгжсөний түүхт 100 жилийн ойд зориулсан номд уралдааны мэдээлэл бичигдэнэ. Бид хүнд даацын машины уралдааныг цаашдаа жил бүр тогтмол зохион байгуулна" хэмээн ярилаа