Гаалийн албан татвараас чөлөөлөх тухай хууль хүчингүй болсонд тооцох тухай хуулийг хэлэлцэж байгаа ч үүнийг яаравчлан батлахгүй байх сонирхол хэнд, ямар бүлэглэлд байна вэ. Тодотговол үндэснийхээ үйлдвэрлэгчдийг татан унагаах, бусниулах эрх ашиг хаана ямар бүлэглэлд байна вэ гэх асуудал зүй ёсоор тулгарч байна. Энд улс төр бизнес бүлэглэлийн томоохон эрх ашиг бий.

Уг хуулийг Засгийн газрын хэрэг эрхлэх газрын даргаар ажиллаж байсан Д.Амарбаясгалан 2024 оны гуравдугаар сарын 05-ны өдөр өргөн барьснаар дөрөвдүгээр сарын 19-ний өдөр батлагдаж байв. Уг хууль батлагдсанаар гадаадаас импортоор хямд өртөгтэй гурил, тэжээл, улаан буудайг гаалийн албан татваргүйгээр оруулж ирэх боломжтой болж, улмаар тариалан эрхлэгчид гурил үйлдвэрлэгчдээ татан унагаасан.

Тус хуулийг баталж хэрэгжүүлсэн ганцхан жилийн хугацаанд нийтдээ 66 тэрбум төгрөгийн 60 сая орчим килограмм гурил орж ирсэн. Үүний үр дагавар нь улаанбуудай тарих тариаланчид байхгүй болсон. ХАА-н салбар 28.4 хувиар унасан. Гэтэл ниргэсэн хойно нь хашгирав гэгчээр одоо үүнийг засах тухай ярьж байна. Баталчихаад дараа жил нь өөрчлөөд байдаг хууль тогтоомжийн тогтворгүй байдал чинь бизнес эрхэлж байгаа олон мянган хүний нөхцөл байдлыг тодорхойгүй болгож байна.

Хамгийн гол нь тариа ногооны ажил эхэлчихээд байхад хуулиа батлаагүй байгаа нь энэ салбарыг бүр мөсөн татан унагаах гэсэн бүлэглэлийн ажиллагаа байгааг нуух хэрэггүй. Тодотговол, гурил улаан буудайн үнийг барьж байгаа мафийнхан улстөрчидтэй бүлэглэл байгаа нь ойлгомжтой.

Tumen.mn