Монгол Улсын гавьяат тамирчин Ц.Шаравжамц АНУ-ын Чикаго хотод байрлах "Монгол Авьяас Академи"-тай хамтран хүүхдийн шигшээ баг бүрдүүлэн NBA болон NCAA-ийн мэргэжлийн тоглогчдын төрөн гарсан АНУ-ын AAU хүүхдийн лигт оролцох талаар өнгөрсөн нэгдүгээр сард мэдээлж байв. Улмаар бүртгэлээ хийж, хүүхдүүдээ элсүүлж эхэлсэн. Тэгвэл өнөөдөр тус бүртгэлд хамрагдсан хүүхдүүдээс 51-ийг сонгон АНУ-ыг зорьж байна. Энэ талаар тэрбээр өөрийн цахим хуудаснаа "За бид нислээ. Том мөрөөдөлтэй хүүхдүүдээ аваад мөрөөдөлд нь нэг алхам ойртуулахын төлөө явлаа. Хүүхдүүдэд маань амжилт хүсээрэй. Энхийн-Одын гаргасан жимийг зам болтол нь өргөн болгоно оо. Энэ удаад 51 хүүхэд Америкийг зорьж байна. Улам олуулаа болно оо" хэмээн нийтэлжээ.