Баруун дөрвөн замаас Зүүн дөрвөн зам хүртэлх явган хүний замын хавтанг чулуугаар солих ажлын хүрээнд Чингэлтэй дүүргийн нэгдүгээр хороо, Туркийн ЭСЯ, Цэцэг төвийн уулзвар хэсэгт Чингисийн өргөн чөлөөний замын урд, хойд талын явган хүний замын хавтанг чулуугаар солих юм байна. Уг ажлын явцын талаар гүйцэтгэгч Сант-Өндөр компанийн инженер Т.Батдэлгэр "Манай компани нийслэлийн явган хүний замыг шинэчлэх ажлыг есдүгээр сарын 25-н хүртэл гүйцэтгэх гэрээтэй. Нийт 30,000 м.кв талбайгаас 5,200 м.кв явган хүний замын талбайн чулууг сольсон. Чулууны бат бэх болохгүй байна гэсэн учраас чулуугаа БНХАУ-аас татаж авч байгаа" гэлээ.

Дараагийн удаад үндэсний үйлдвэрлэгчээс чулуугаа авч, Төв шуудан дагуу явган хүний замын хавтанг хэсэгчлэн солих аргачлалаар шөнийн ээлжээр гүйцэтгэхээр болов.

Харин хуулсан хуучин хавтангуудыг дүүргүүдэд хүлээлгэж өгч байгаа юм байна. "Баруун дөрвөн замаас Зүүн дөрвөн зам хүртэлх явган хүний замын хавтанг чулуугаар солих ажлын гүйцэтгэл 30 хувьтай байна. Цэцэг төвийн уулзвар хүртэлх явган хүний замыг чулуун болгох ажлын явц төлөвлөгөөнөөс хоцролттой, хугацаандаа дуусгахгүй бол шаардлагатай арга хэмжээг авна" гэж НЗД-ын орлогч Т.Даваадалай мэдэгдэв.