Эрүүл мэндийн даатгалын ерөнхий газар (ЭМДЕГ)-ын дарга асан Л.Бямбасүрэн тэргүүтэй 11 хүнд холбогдох хэргийг өчигдөр Баянгол, Хан-Уул, Сонгинохайрхан дүүргийн эрүүгийн хэргийн анхан шатны тойргийн шүүхэд хэлэлцэхээр товлосон ч нэг бус шүүгдэгч, тэдний өмгөөлөгч нарын хүсэлтээр хойшлууллаа. Тухайлбал, шүүгдэгч, “Нандин-ухаан” эмнэлгийн гүйцэтгэх захирал Т.Ариунтуяагийн эрүүл мэнд гэнэт муудаж, хэвтэн эмчлүүлж буй учраас хойшлуулах хүсэлт гаргасан байна. Мөн Баянзүрх дүүргийн нэгдсэн эмнэлгийн ерөнхий эмчээр ажиллаж байсан Ө.Айгиймаагийн өмгөөлөгч нь эрүүл мэндийн шалтгаанаар хуралд оролцох боломжгүйгээ илэрхийлсэн аж. ЭМДЕГ-ын мэргэжилтэн Б.Номинсувдын өмгөөлөгч Р.Булгамаа бас БНСУ-ыг зорьсон гэх зэрэг шалтгаанаа шүүхэд мэдүүлж, албан бичгээр хандсан бол У.Бямбасүрэнгийн өмгөөлөгч Д.Чинзориг Сэлэнгэ аймагт шүүх хурал давхацсан хэмээсэн байна. У.Бямбасүрэнгийн өмгөөлөгч өмнө нь ч бас ийм шалтгаанаар шүүх хурлыг хойшлуулсан учраас НПГ-ын хяналтын прокурор Г.Онон “Хэрэг хянан шийдвэрлэх ажиллагаанд санаатай саад учруулж байна” гэж үзэж буйгаа илэрхийлсэн. Улмаар шүүгдэгч У.Бямбасүрэнд авсан таслан сэргийлэх арга хэмжээг өөрчилж, цагдан хорих санал гаргалаа. Баянгол, ХанУул, Сонгинохайрхан дүүргийн эрүүгийн хэргийн анхан шатны тойргийн шүүхийн шүүгч Н.Нямдаваа, Ц.Дайрийжав, Ц.МөнхЭрдэнэ нар зөвлөлдөөд шүүгдэгч У.Бямбасүрэнг цагдан хорих саналыг хүлээн авахаас татгалзав.

Ингээд шүүх хурлыг аравдугаар сарын 8-ны 08.30 цагт хийхээр товлосон юм. ЭМДЕГ-ын дарга асан Л.Бямбасүрэн, Нэхэмжлэлийн хяналтын хэлтсийн дарга А.Төвшин болон мэргэжилтэн Б.Номинсувд, С.Ундрам, Д.Баянжав, зарим эмнэлгийн албан тушаалтнууд болох Ө.Айгиймаа, Ө.Мөнхтулга, С.Цэдэнсодном, П.Алтантуяа, Т.Ариунтуяа, Т.Анхтуяа нарыг Эрүүл мэндийн даатгалын сангийн хөрөнгийг хууль бусаар зарцуулж авсан, бусдад давуу байдал олгосныхоо ха¬риуд хахууль авсан, өгсөн хэмээн буруутгаж буй билээ. ЭМДЕГ-ын албан тушаалтнууд нэг бус удаа хахууль авч, эрүүл мэндийн байгууллагуудад давуу байдал олгож байсныг АТГ-ын мөрдөгчид тогтоон, өнгөрсөн оны арваннэгдүгээр сард яллах дүгнэлт үйлдүүлэхээр НПГ-т шилжүүлсэн юм.

Тодруулбал, ЭМДЕГ-ын мэргэжилтэн Б.Номинсувд нь дотор, уламжлалт, мэдрэл, нүдний өвчний оношилгоо, эмчилгээ, эхо, клиник, биохимийн лабораторийн оношилгооны чиглэлээр үйл ажиллагаа явуулдаг “Нандинухаан” эмнэлгийн гүйцэтгэх захирал Т.Ариунтуяа, түүний төрөл садангийн хүн болох “Гэгээн манал” эмнэлгийн захирал Т.Анхтуяа нараас 100 орчим сая төгрөгийн хахууль авч, 1000-аас дээш хүний төлбөрийг Эрүүл мэндийн даатгалын сангаас гаргуулсан гэдэг. Уг мөнгөө А.Төвшин, Л.Бямбасүрэн нарт хувааж өгсөн байдаг.

Unuudur.mn