Өндөр настан, зүрх, судасны өвчтэй, цусны даралт өндөртэй хүмүүсийг энэ долоо хоногийн пүрэв, баасан гарагт эрүүл мэнддээ онцгой анхаарахыг мэргэжлийн байгууллагынхан зөвлөв.

Учир нь эдгээр өдөр байгаль, цаг уурт тааламжгүй зүйл тохиолдож, сөрөг нөлөө үзүүлж болзошгүй аж. Тодруулбал, өнөөдөр наран дээр хүчтэй тэсрэлт болж, соронзон шуурга дэгдэнэ гэж Одон орон, нарны идэвхжлийн олон улсын судалгааны хүрээлэнгээс анхааруулжээ.

Энэхүү соронзон шуурганы нөлөө нь пүрэв, баасан гарагт дэлхийг чиглэн ирж, Төв Ази, ОХУ, тэр дундаа Монгол орны нутгаар нарны соронзон орны идэвхжил өндөр түвшинд хүрэх гэнэ. Тухайлбал, пүрвээс баасан гарагт шилжих шөнө нарны соронзон орны нөлөөгөөр Хөвсгөл, Завхан, Архангай, Булган, Сэлэнгийн ихэнх, Төв, Өвөрхангай, Дундговь, Өмнөговийн зарим сумын нутгаар хур тунадас, Хөвсгөл, Завхан, Архангайн уулсаар, Хэнтийн нурууны орчмоор нойтон цас орж, шөнөдөө эрс хүйтрэх юм байна. Мөн эдгээр бүс нутгаар салхины хурд секундэд 12-14 метрт хүрч, хүчтэй шуурах бөгөөд шөнөдөө 0-4 хэм хонох аж. Тиймээс эдгээр өдөр иргэдийг эрүүл мэнддээ анхаарч, тээвэрчид, жолооч нарыг орон нутгийн замд анхаарал болгоомжтой зорчихыг сэрэмжлүүлжээ.