Монгол Улсын ирээдүй болсон хүүхэд залуучуудад боломж олгоно гэдэг хамгийн том хөрөнгө оруулалт гэдэгтэй хэн ч маргахгүй. Тэгвэл Нийслэлийн Иргэдийн Төлөөлөгчийн Хурлын төлөөлөгч, “Улаанбаатар орон сууцжуулалт” компанийн захирал З.Төмөртөөмөө “Let’s Edu” боловсролын тэтгэлэгт хөтөлбөрийг санаачлан, Чингэлтэй дүүргийн 24 оюутанд тэтгэлэг гардуулж өгчээ. Тодотгвол, их, дээд сургуульд шинээр элсэн орж буй оюутнуудын суралцах идэвхийг нэмэгдүүлэх, нийгмийн хариуцлагатай иргэдийг төлөвшүүлэх, ирээдүйн манлайлагч залуусыг бэлтгэх зорилго дор энэхүү хөтөлбөрийг санаачлан хэрэгжүүлсэн нь нүдээ олсон зүйл болов.

Тиймээс Төлөөлөгч З.Төмөртөөмөө өөрийн цахим хуудаснаа "Хөтөлбөрт хамрагдсан Чингэлтэй дүүргийн 24 дүгээр хорооны нэгдүгээр курст элсэн орж буй дүү нартаа Төлөөлөгчийн зүгээс сургалтын тэтгэлэг гардуулж өглөө. Дүү нартаа хичээлийн шинэ жилийн мэнд дэвшүүлье. Мөн Чингэлтэй дүүргийн 24 дүгээр хорооны Засаг дарга болон ажилтнууд шилдэг 24 оюутныг шалгаруулах, ажлыг амжилттай зохион байгуулсанд сэтгэгдэл их өндөр байна. Хөтөлбөрийг дэмжсэн найз нөхдөдөө юуны өмнө талархлаа. Мөн оюутан залуусыг дэмжих “Дэвжих ирээдүйн давалгаа” НҮТББ-тай хамтран энэхүү хөтөлбөрөө хэрэгжүүлж байгаагаа дуулгахад таатай байна. Боловсрол эзэмшихэд тулгардаг санхүүгийн бэрхшээлийг хөнгөлөх замаар оюутнуудыг хичээлдээ бүрэн анхаарч, үр бүтээлтэй суралцах боломжоор хангах нь юу юунаас чухал. Хөтөлбөр цаашдаа улам бүр өргөжиж, зуу зуун оюутан залуусаар эгнээгээ тэлнэ гэдэгт итгэж байна. Нийгмийн халамжийн үйлчилгээ ахмадууд болон бага насны хүүхдүүдэд харьцангуй хүртээмжтэй байдаг ч оюутан залуусын хувьд хязгаарлагдмал байдаг. Тиймээс “Let’s Edu” хөтөлбөрийг маань эцэг, эхчүүд ч цаашид дэмжиж, хариуцлагатай байхаа илэрхийлж байгаад талархалтай байна" хэмээжээ.

Хүүхэд залуусын суралцах нөхцлийг бүрдүүлэх нь энэ улсын ирээдүйд хөрөнгө оруулж байгаа томоохон ажил учраас нийслэлчүүд тэр тусмаа чингэлтэйчүүд Нийслэлийн Иргэдийн Төлөөлөгчдийн Хуралд өөрсдийг нь төлөөлж байгаа З.Төмөртөөмөө төлөөлөгчид талархаж байгаагаа илэрхийлж, энэхүү ажлыг дэмжиж ажиллахаа илэрхийлжээ.

Tumen.mn