Ам.долларын ханш энэ он гарснаас хойш тасралтгүй өссөөр дөрөвдүгээр сард 3500, долоодугаар сарын сүүлчээр 3600-гаас давсан бол өдгөө 3615 төгрөгт хүрээд байна. Төвбанкнаас зарласан ханшаар “ногоон” өчигдөр 3593 төгрөгтэй тэнцэж байсан бол “Найман шарга” захад ченжүүд 3606-3608 төгрөгөөр худалдан авч, 3614-3616 төгрөгөөр борлуулж байв. Энэ нь өнгөрсөн оны сүүлчийнхээс 6.3 хувиар буюу 210, таван сарын өмнөхөөс 3.3 хувиар буюу 116 төгрөгөөр өссөн дүн юм. Арилжааны банкнуудад “ногоон”-ы ханш харьцангуй зөрүү багатай байна. Тухайлбал, банкнууд өчигдөр ам.долларыг бэлнээр 3585-3587 төгрөгөөр худалдан авч, 3610-3613 төгрөгөөр борлуулж байсан юм. Харин бэлэн бусаар арилжаа хийхдээ 3594-3595 төгрөгөөр худалдаж байв. “Найман шарга” захын болон арилжааны банкны ханш гуравхан төгрөгийн зөрүүтэй бол Монголбанкнаас тогтоосон ам.долларын албан болон валют арилжааны төв дэх албан бус үнийн зөрүү 23 төгрөгт хүрэв. Эдийн засагчид энэ зөрүүг өнгөрсөн хавраас хойш тогтвортой хадгалагдаж буй үзүүлэлт гэдгийг дурджээ