УИХ-ын гишүүн Б.Энхбаяр хэвлэлд “ам нээсэн” нь олон нийтийн анхаарлыг ихэд татаж байна. Түүний ярилцлага мэдээж МАН-ын даргын зодоонд зориулж буй бэлэг гэдэг нь тодорхой гэдгийг улстөрийн хүрээнийхэн байтугай нь харлаа, үзлээ.

Харин Хууль зүй, дотоод хэргийн сайд явсан хүн ажиллаж байсан цаг хугацаандаа олж авсан баримт, мэдээллүүдээ хав дарж байгаад улстөрийн тоглоомд ашиглаж байгаа нь байж болох асуудал мөн үү.

Б.Энхбаяр энэ удаа зөвхөн нүүрсний сонсголтой холбоотой асуудлаас хөндөж байна билээ.

Тэгвэл тэр өнгөрсөн хугацаанд Хууль зүй, дотоод хэргийн дэд сайд, сайд байснаас гадна нүүрсний болон “Хөгжлийн банк”-ны сонсголыг ахалсан, тэргүүлсэн. Тэр хэмжээгээрээ дахиад ч олон хэргийн баримт, нотолгоог Б.Энхбаяр “атгачхаж” гэж ойлгогдохоор байна.

Түүнийг 2023 оны 10 сарын 5-нд ХЗДХ-ийн сайдаар Ерөнхий сайд Л.Оюун-Эрдэнэ томилж байсан бөгөөд алдарт “Нүүрсний сонсгол”-ын эхний үе шатыг 2023 оны 12 сарын 4-нд эхлүүлж байв.

Мөн өмнө нь “Нүүрсний сонсгол”-ынхоо дараа буюу 2024 оны хоёрдугаар сард яг энэ “Лхагвын тойм” нэвтрүүлэгт орж л явсан хүн.

Тэр үед Б.Энхбаяр яагаад дуугараагүй вэ, түүнээс хойш 2024 онд УИХ-ын сонгуулийн дараа ч Л.Оюун-Эрдэнэ байсаар л байсан. Б.Энхбаяр бас л чимээгүй явсаар өнөөг хүрсэн.

Өөрөөр хэлбэл, Б.Энхбаяр 2023 оноос хойш дээрэм, луйвар, албан тушаалын гээд хүндэрч явсаар хүн амины хэргийг ч нуун дарагдуулсаар өдийг хүрч. Цаашид ч дээрх сонсголуудаас олж авсан баримтуудаар дараа, дараагийн хүмүүсийг “алах” аль эсвэл өөрөө албан тушаалд очих шат, гишгүүр болгон ашиглах нь энүүхэнд байгаа аж.

Тэгэхээр хууль зөрчсөн олон гэмт хэргийг нуун далдалсан Б.Энхбаярыг бас шалгах шаардлага үүсэж байгаа юм биш үү. Яагаад ХЗДХ-ийн сайд байсан хүн хэргээр наймаалцаад сууж байна вэ…

Эх сурвалж: erennews.mn