МАН-ын Бага хурал өнгөрөгч бямба гаригт болж, шийдвэр гаргасантай холбогдуулан, АН-ын Улс төрийн зөвлөл болон УИХ дахь Ардчилсан намын бүлэг хуралдаж МАН-ын удирдагуудад хандаж албан шаардлага гаргажээ.

Энэхүү шаардлагад МАН-ын даргын сонгуулиас үүдсэн улс төрийн нөхцөл байдлыг тодорхой болгох, УИХ-ын дарга Д.Амарбаясгалан үнэхээр ноцтой гэмт хэрэгт холбогдолтой бол хууль хяналтын байгууллагаар шалгуулах, түүнийх нь дараа парламентын үйл ажиллагааг удирдах, нөгөөтэйгүүр хэрэв гүтгүүлсэн бол гүтгэсэн этгээд хариуцлагаа хүлээх ёстой гэсэн байр суурийг илэрхийлсэн.

Түүний хариуд Д.Амарбаясгалан дарга “Улс төрийн намууд бие биенийхээ дотоод асуудалд оролцох нь зохисгүй бөгөөд шүүх тогтоогоогүй тохиолдолд хэнийг ч гэм буруутай гэж үздэггүй Үндсэн хуулийн зарчимтайг Та мэдэх биз ээ. Дашрамд миний бие өнөөдрийг хүртэл хууль хяналтын байгууллагад аливаа асуудлаар шалгагдаагүй болно. Харин надтай холбоотой зохион байгуулалттайгаар тараасан гүтгэлгийг шийдвэрлүүлэхээр холбогдох байгууллагуудад шалгуулахаар хандсаныг үүгээр мэдэгдэж байна” хэмээн зөвлөгөө өгөх гэсэн АН-ын дарга О.Цогтгэрэлд эргүүлэн, хууль зүй, улс төрийн намын талаас зөвлөгөө өглөө.

Харин олон нийт “АН бол МАН-д зөвлөөд байх төлөвшилтэй, эв нэгдэлтэй улс төрийн хүчин биш. Дөнгөж өчигдөр учраа олж, өөрсдийгөө яая гэж яваа нам. Тиймээс АН өөрсдийгөө л хичээх хэрэгтэй” гэж байна.

Tumen.mn