Улс төрийн тулхтай, туршлагатай хэмээх МАН-ынхан хоёр гурав талцан, төр, нийгмийн ажлыг гацаан тулхаа алдаж байна. Энэ нь Төрийн бүх шатанд нөлөөлж байгаад иргэд олон нийт шүүмжлэлтэй хандах болов. Намын даргын төлөө өрсөлдөж болох ч улс даяар нь талцуулан, ажил гацааж байгааг харсан хэний ч тэвчээр барагдах биз ээ. Тиймдээ ч Ерөнхийлөгчийг гарч ирээд таслан зогсоох байх гэсэн найдлага байгаа ч тэр хараахан гарч ирээгүй байна.
Уг нь У.Хүрэлсүх МАН хэмээх намд гуч гаруй жилийн өмнө хөл тавьж, энэ цагаас хойш төрийн бүхий л өндөрлөгт ажиллаж үзсэн хүн. Тодотговол, нам, түүний гишүүд дэмжигчдийн буянаар өндөрт жаалж ирсэн хүн.

Өдгөө Ерөнхийлөгч Үндэсний аюулгүй байдлын зөвлөлийн даргаар дөрөв дэх жилдээ ажиллаж байна. Ард түмний эв нэгдлийг илэрхийлэгчийн хувиар ч тэр, энэ намд идэр залуугаасаа зүтгэсэн удирдагч хүний хувьд ч тэр яагаад энэ үймээнийг зохицуулахыг хүсэхгүй байгаа юм. Яагаад ....
Гадаа талбайд иргэд олон нийт жагсаж, Төрийн ордонд албан тушаалын төлөө амь тавин тэмцсэн өдрүүд үргэлжилж байна. Нийгэм эдийн засгийн хөөстэй үзүүлэлт л байгаа болохоос биш, нөхцөл байдал сайнгүй байна. Гэтэл МАН-ын хоёр үеийн лидерүүд дундаа зодолдож, МАН-ыг хоёр хуваагаад зогсохгүй, нийгмийг талцуулж эхэллээ. МАН-ын зовлонг улсын зовлон болгочихлоо.
Ерөнхий сайд Г.Занданшатар, УИХ-ын дарга Д.Амарбаясгалан нар хоёр талд бие биеэ унагаахаар гарын үсэг цуглуулаад эхэлсэн нь улс төр, нийгэмд үүсээд байгаа асуудлыг улам өрдөж байна. Эрхэм хоёрын хар өрсөлдөөн эрэг савнаасаа аль эрт хальж улс гүрнийг хамарсан.
Улс төрийн 100 гаруй жилийн түүхтэй ууган намд энэ хоёр нөхөр хориодхон настай хөл тавьсан цагаас хойш гишүүд дэмжигчдийн итгэлийг олон жил хүлээж, төрийн дээд өндөрлөгт явж ирсэн. Гэтэл тэдэн рүүгээ эргүүлэн ус цацаж, намаа, улсаа хагалан бутаргаж байгаа нь харамсалтай.
Дахин хэлэхэд манай улсын нийгэм, эдийн засгийн байдал ч сайнгүй, эрхэм дээдсүүд л хөөстэй тоо танилцуулж байгаагаас өөр гэрэл гэгээ тун ховор. Ийм нөхцөлд үтэр түргэн нэг талдаа гарах ёстой.