УИХ дахь Төрийн байгуулалтын байнгын хорооны өнөөдрийн хуралдаанаар олон нийтийн радио, телевизийн Үндэсний зөвлөлийн 2024 оны үйл ажиллагааны тайланг хэлэлцэж байна.

Аудитын байгууллагын дүгнэлтээр Монголын Үндэсний Олон Нийтийн Радио Телевиз (МҮОНРТ) нь үйл ажиллагааны тайлан болон шилэн дансны мэдээллийг цахим хуудсандаа байршуулаагүй.

Мөн үйл ажиллагаатай холбоотой төлөвлөсөн нийт ажлын 40 хувийг Үндэсний зөвлөлөөр хэлэлцээгүй. Хуулийн хэрэгжилтийг хангаагүй, өнгөрсөн дөрвөн жилд улсын төсвөөс үзүүлсэн 30 гаруй тэрбумын төсөвт тогтмол аудит хийлгээгүй гэх тайлан ирүүлжээ.

Үүнтэй холбогдуулан УИХ-ын гишүүд Монголын Үндэсний Олон Нийтийн Радио Телевизийн удирдлагуудаас асуулт асууж, хариулт авав.

УИХ-ын гишүүн Ө.Шижир: МҮОНРТ нь 650 хүний орон тоотой, 26 тэрбум төгрөгийн үйл ажиллагааны зардалтай, үндсэн хөрөнгө 16 тэрбум төгрөг юм байна. Энэ телевизийн үндсэн хөрөнгө 16 тэрбум төгрөгөөр үнэлэгдэж байгаа юм уу, маш том обьект шүү дээ. Кино фондыг 4.2 тэрбумаар үнэлсэн байна, үүнийг яаж үнэлсэн юм бэ. Бас нэг логикийн зөрчил байгаа, Үндэсний телевиз үздэггүй хүмүүс хураамж төлөх нь зөв үү. МҮОНРТ үзэлтээрээ бусад арилжааны телевизээс хэдэд байдаг вэ.

МҮОНРТ-ийн Үндэсний зөвлөлийн дарга Н.Монсор: Хөрөнгийн үнэлгээг дахин хийх процесс Монгол Улсад харьцангуй шинэ юм байна. Монголд үзэлтийн судалгааг нарийн гаргадаг байсан компани маань дампуурчихсан. Би 2023 онд намар ирээд нэг судалгааг цөөхөн хүнээс хийсэн. 2022 онд Эм Эм Си Ди-ийн хийсэн судалгаа бий. Зарим контент маань маш их үзэлттэй, тодорхой контентын үзэлт бага байдаг. Уран бүтээлийн хоёр хувийг нэмэх асуудлыг дотроо ярьж байгаад хуулийн санал явуулж болох байх. Олон улсаас харахад тухайн үндэстний өв соёлыг тээж байгаа гэдэг утгаас сурталчилгаа явуулах үндэсгүй гэж үздэг улс орон байдаг. Сүүлд NHK-ийн түншүүдтэй уулзахад хураамжаа нэмэх бус нэг удаад багасгасан гэсэн. Учир нь тоног төхөөрөмжөө шинэчлэх ажлыг сүүлийн арван жил хийсэн учраас хураамжаа багасгаж байсан гэсэн.

УИХ-ын гишүүн О.Алтангэрэл: Үеийн үед энэ телевизийг ажилчид олонтой бүтээмж багатай гэдэг асуудал гардаг байсан. Ажилчин албан хаагчийн ажлын байрны давхцал, хөдөлмөрийн бүтээмж дээр хийсэн ажил байгаа юу.

МҮОНРТ-ийн гүйцэтгэх захирал Г.Гэрэл: 2024 оны эхэнд 5.8 тэрбум төгрөгийн үйл ажиллагааны алдагдалтайгаар энэ байгууллагыг хүлээн авсан. Улсын төсвийн дэмжлэг байгаагүй бол энэ алдагдлыг даван туулах хэцүү байсан. Өнөөдрийн байдлаар манай телевизэд 512 хүн ажиллаж байгаа. Өмнөх өр авлага яагаад үүссэн бэ гэвэл орлого шийдээгүй байж цалин хөлс нэмэх шийдвэр гарснаас болж гэнэтийн асуудалд орсон. Тиймээс улсын төсвийн дэмжлэгээр энэ асуудлаас гарсан. Дахиж ийм нөхцөл байдалд хүрэхгүйн тулд нэгдүгээрт бүтэц орон тоог оновчтой болгох, орлого олох, буцаагаад хөтөлбөртөө шингээх ажлуудыг хийсэн. 512 хүний үйл ажиллагаа тогтмол явах үүднээс цалин өсөн нэмэгдэж байх шаардлагатай. Гэхдээ төсвийн янз бүрийн асуудлаас болж цалингаа нэмж чадахгүй байгаа. Орлогын эх үүсвэрийг өөрийн боломжид тулгуурлаж шинэчлэх сайжруулах аргыг эрэлхийлж ажиллаж байна