Дэлхийн хамгийн анхны дархан цаазат Богд хан уулын хамгаалалтын бүс буюу Их, Бага тэнгэрийн амны дунд, Бөөгийн модтой энгэрийн ар хормойд М Ти Эс ХХК-ийнхан ямар ч зөвшөөрөлгүйгээр барилгын ажил явуулж, 4-5 давхар хоёр объект барьж эхэлснээс хойш багагүй хугацаа өнгөрлөө. Дархан цаазтай уулаас гадна төрийн тусгай хамгаалалттай бүсэд хамаарагдаж болохуйц энэ газарт дээрх компанийнхан дураараа барилга барьж байгаа юм.

Уг нь Төрийн тусгай хамгаалалтын тухай хууль, түүнийг дагалдуулан Засгийн газрын 2012 оны 65 дугаар тогтоолоор баталсан Төрийн тусгай хамгаалалтад зайлшгүй байх шаардлагатай зүйлийн жагсаалтын 20 дугаарт Их тэнгэрийн ам, 24 дүгээрт тус амны гүүрийг байнга байхаар тусгасан. Гэтэл энэ амнаас зүүн тийш нэг их холгүй газарт тэдгээрийг босгож байхад Төрийн тусгай хамгаалалтын газрынхан нүдэн балай чихэн дүлий суугаа. М Ти Эс ХХК-ийнхан зөвхөн дээрх хууль тогтоомжоос гадна Тусгай хамгаалалттай газар нутгийн тухай хуулийн 11.7 дахь хэсгийн “Аялагч, зөвшөөрөл бүхий бусад хүн түр буудаллах, отоглох, ажиглалт, судалгаа шинжилгээ хийх зориулалттай орон байр барих, ашиглах”-ы г зөвшөөрөх заалтыг зөрчин хэд хэдэн барилгын каркас босгоод буй юм.

Шатахууны бөөний болон жижиглэнгийн худалдаа, архины үйлдвэр, газар тариалангийн чиглэлээр үйл ажиллагаа явуулдаг М Ти Эс ХХК-ийн захирал, эцсийн өмчлөгч П.Бат-Эрдэнийг үүнээс үүдэн АТГ-ынхан өнгөрсөн тавдугаар сард дуудаж тайлбар, мэдүүлэг авч байв. Түүгээр ч зогсохгүй барилгын үйл ажиллагааг зогсоосон юм даг. Гэвч үүнээс хойш барилгаа барьсаар, холбогдох байгууллагын шийдвэрийг үл ойшоосоор өдий хүрчээ. Магадгүй хамаарал бүхий хүмүүс нь төрийн өндөр албан тушаалд байдаг, өөрсдөө хөрөнгө мөнгө ихтэй зэрэгтээ эрдээд хууль, хяналтын байгууллагынхныг үл тоомсорлон барилгаа үргэлжлүүлж барьж байхыг ч үгүйсгэхгүй.

Уг нь өнгөрсөн тавдугаар сарын 14-нд нийслэлийн Засаг даргын Тамгын газрын дарга Д.Амгалан “Богд уулын Их, Бага Тэнгэрийн амны авто зам дагуу зөвшөөрөлгүй эхэлсэн барилгын ажлыг зогсоосон. Барилгын компанийн удирдлагуудаас тайлбар авахаар нийслэлийн Хяналт шалгалтын газарт ирэхийг дуудсан. Зөрчлийн хэрэг нээсэн. Зөвшөөрөлгүй барьж буй барилгыг Улсын комисс хүлээж авдаггүй, улсын бүртгэлд ч бүртгэдэггүйг аж ахуйн нэгжүүд ойлгох хэрэгтэй” хэмээн хэвлэлийнхэнд мэдээлэл өгч байсан билээ. Ийнхүү мэдээлэл хийж байх үед нь 3-4 давхрын каркасыг босгож байсан юм даг. Харин түүнээс хойших таван сар гаруйн хугацаанд тэнд барьж байгаа барилгуудаа үргэлжлүүлсээр байв. Аравдугаар сард л гэхэд заримынх нь цутгалтыг хийсээр байлаа. Өөрөөр хэлбэл, хууль хяналтын байгууллагынхны барилгын ажлыг зогсоох шийдвэрийг үл ойшоон ажилласаар байсан гэсэн үг

10 САЯАР ТОРГУУЛСАН Ч АЖЛАА ҮРГЭЛЖЛҮҮЛСЭЭР БАЙНА

Их, Бага Тэнгэрийн амны дунд зөвшөөрөлгүйгээр барилга барьж буйтай холбоотойгоор АТГ-аас нийслэлийн Хотын стандарт, хяналт шалгалтын газарт албан бичиг ч хүргүүлсэн аж. Энэ талаар Хотын стандарт, хяналт шалгалтын газрынхнаас тодруулахад “АТГ-аас өнгөрсөн тавдугаар сард ирүүлсэн албан бичгийн хүрээнд төлөвлөгөөт бус хяналт шалгалт хийсэн. Улмаар барилга угсралтын ажлыг зөвшөөрөлгүйгээр гүйцэтгэж байсан үйлдэлд нь зөрчлийн хэрэг нээн шалгасан. Ингээд М Ти Эс ХХК-д Зөрчлийн тухай хуулийн 12.1-2.1 дэх хэсгийн “Барилгын тухай хууль зөрчиж, хуульд заасан барилгын ажлын зөвшөөрөл аваагүй” гэх заалтын дагуу 10 сая төгрөгөөр торгох шийтгэвэр оноосон. Үүний зэрэгцээ эрх бүхий албан тушаалтны зүгээс барилга угсралтын ажлыг зогсоох тухай албан даалгавар өгсөн.

Харамсалтай нь, барилга угсралтын ажлыг давтан гүйцэтгэсээр байсан тул гүйцэтгэгч байгууллага болох “Принцесс озеро” ХХК-д мөн л Зөрчлийн тухай хуулийн дагуу арга хэмжээ авч, барилга угсралтын ажлыг зогсоох тухай улсын байцаагчийн даалгавар өгсөн. Өдгөө Баянзүрх дүүргийн 11 дүгээр хорооны нутагт М Ти Эс ХХК-ийн захиалгаар барьж буй барилга угсралтын ажлыг албадан зогсоолгохоор нийслэл дэх Захиргааны хэргийн анхан шатны шүүхэд хүсэлт хүргүүлсэн. Мөн барилга угсралтын ажлыг зогсоож, улсын байцаагч барилгын талбайг лацдаад байгаа” гэсэн юм.

Харин АТГ-ынхан “Зөвшөөрөлгүйгээр барилга барьж буй асуудалд хэрэг бүртгэлтийн хэрэг нээн шалгалтын ажиллагаа явуулж байна. Нийслэлийн ЗДТГ-ын харьяа холбогдох агентлагийнхан болон Богд хан уулын дархан цаазат газрын хамгаалалтын захиргааныханд албан бичиг хүргүүлж, үйл ажиллагааг нь зогсоолгохоор хандсан. Дээрх хоёр байгууллага хяналт тавих ёстой. Гэвч үргэлжлүүлэн барьсаар байгаа тухай мэдээлэл бидэнд ирэх болсон. Бид хуулийн дагуу шалгалтаа үргэлжлүүлж буй” хэмээсэн юм. М Ти Эс ХХК-ийнхан хууль зөрчин, шөнийн цагаар барилгаа үргэлжлүүлэн барьж дуусгахаар шулуудсан бололтой. Үүний дараа зөвшөөрлөө авчихна гэсэн зорилготой хууль, хяналтын байгууллагынхны шийдвэрийг илтэд үл ойшоож байгаа нь харагдаж буй юм. Ганц дээрх компанийн барьж буй ч биш, олон компанийнхан хууль, журам зөр¬ чин барилгаа босгочихоод, дараа нь зөвшөөрөл авдаг тогтолцоо манайд нэгэнт бий болчихсон. Тухайлбал, “Авлига хороолол” гэж нэрийддэг “Акуа гарден” хотхоны барилгыг нураана, үйл ажиллагааг нь зогсооно хэмээсэн ч өдгөө баригдаад дуусчихсан. Хан-Уул дүүргийн нутаг, 120 мянгатын уулзвар, Богд хааны ордон музейн замын эсрэг талд орон сууцын нарыг хааж барилга барьсныг шүүхийн шийдвэрээр буулгахаар л болсон. Гэтэл түүнийг нураалгүй, хэдэн жил мартагнуулж байгаад өдгөө ашиглалтад оруулчихсан л байгаа. Эдгээрийн жишгээр М Ти Эс компани, түүний захирал, эцсийн өмчлөгч Пүрэвийн Бат-Эрдэнэ барилгаа ашиглалтад оруулна гэж тооцоолж байхыг үгүйсгэхгүй.

Unuudur.mn