Томуу, томуу төст өвчний халдвар, цар хүрээ нэмэгдсэний улмаас сурагчдын өвлийн амралтыг наашлуулах тухай асуудал Ерөнхий сайдын хэмжээнд хүртэл яригдаад байна. Гэтэл Эрүүл мэндийн сайд Ж.Чинбүрэн өнгөрсөн аравдугаар сард "Энэ өвөл томуугийн үед эмнэлгийн коридорт нэг ч хүүхэд хэвтүүлэхгүй" хэмээн ам өчиг өгч байв. Харин өнөөдөр айл бүрд ханиадтай хүүхэд зовуурилаж, эцэг эхийн аль нэг нь ажлаа орхиод хүүхдээ асрахаас өөр сонголтгүй болоод, эмнэлгүүдийн үзлэгийн ачаалал 3-4 цагаар хэмжигдэж буй. Эмчид хүүхдээ үзүүлэх гэж олон цагаа дугаарлах явцад дахин шинэ халдвар авч, өвчнийг нь улам хүндрүүлэх эрсдэлтэй болоод байгаа энэ үед олон нийт Эрүүл мэндийн сайдад амлалтыг нь сануулж, хариуцлага нэхэж байна.

Харин Ж.Чинбүрэн сайд яамныхаа сошиал хаягаар "Эмнэлгийн коридорт нэг ч хүүхэд хэвтүүлэхгүй гэдэг нь улс төрийн амлалт бус бүгд вакцинжуулалтад хамрагдъя, эрүүл мэндийн салбар илүү их бэлтгэлтэй өвөлжье гэсэн тэмүүлэл юм шүү" хэмээн сар гаруйн өмнөх попролоо тайлбарлажээ. Мөн түүний зөвлөхөөр ажиллаж буй Б.Дэмбэрэл хэмээх эрхэм өөрийн цахим хаягтаа "Өнөөдрийн байдлаар улсын хэмжээнд эмнэлгийн коридорт шалан дээр хэвтэн эмчлүүлж байгаа ганц ч хүүхэд байхгүй гэдгийг хариуцлагатайгаар мэдээлж байна" хэмээх эхлэлтэй сүржин зүйлийг бичсэн байв.

Үнэндээ сайд, түүний зөвлөх хоёрын үзэж байгаачлан коридорт хүүхэд хэвтүүлээгүй л бол эрүүл мэндийн салбарынхан болоод сайд нь сайн ажиллаж байна гэсэн үг биш л дээ. Хүний хамгийн анхдагч хэрэгцээний нэг болох эрүүл мэндийн тусламж үйлчилгээг хүндрэлгүй, олон цагаар дугаарлахгүйгээр авдаг байх эрхтэй. Гэтэл өнөөдөр аль нэг дүүргийн байтугай хувийн эмнэлэгт хүүхдээ үзүүлэх цаг олдохгүй байгаа.

Эмнэлэгт үзүүлээд "Хэвт" гэдэг үгийг эмчээс сонссон ч олон хүүхдийн дунд шинэ халдвараар нэмж өвчлүүлснээс гэрээр эмчилсэн нь арай дээр байгаа учир эмнэлгийн коридорт газраар хэвтэх хүүхэд одоогоор байхгүй байгаа юм шүү сайд аа