Засгийн газрын өнөөдрийн хуралдаанд Бортээгийн ордыг эдийн засгийн эргэлтэд оруулах бэлтгэл ажлыг танилцуулжээ. Энэ талаар "Эрдэнэс Тавантолгой" (ЭТТ) ХК-ийн Гүйцэтгэх захирлын үүрэг гүйцэтгэгч Н.Цэрэнсамбуу сэтгүүлчдэд мэдээлэл өгөв. Бортээгийн ордын Техник, Эдийн Засгийн Үндэслэл(ТЭЗҮ) 2020 онд батлагдсан байна. Засгийн газраас 2025 оны арваннэгдүгээр сард ТЭЗҮ-г шинэчлэн батлуулах үүрэг чиглэл өгсний дагуу "Эрдэнэс Тавантолгой" ХК ордын нэгдсэн ТЭЗҮ-ийн шинэчлэхээр ажиллаж буй бөгөөд ирэх оны эхний улиралд багтаан эцэслэхээр төлөвлөжээ.

Мөн ЭТТ ХК-ийн сүүлийн гурван жилийн санхүүгийн тайланд олон улсын хараат бус хөндлөнгийн аудит оруулахаар сонгон шалгаруулалтыг үргэлжлүүлж байгааг тус компанийн Гүйцэтгэх захирлын үүрэг гүйцэтгэгч Н.Цэрэнсамбуу хэллээ. Тэрбээр "Бортээгийн орд нь 424 сая тонн нүүрсний нөөцтэй. 95 хувь нь сул коксжих, таван хувь нь эрчим хүчний нүүрс. ЭТТ компани сүүлийн гурван жилд 30 сая орчим тонн нүүрс экспортолсон. Үүнийг нэмэгдүүлэхэд Бортээгийн ордыг эдийн засгийн эргэлтэд оруулах, гадаадын хөрөнгө оруулагчийн нээлттэй сонгон шалгаруулалт зохион байгуулах хүрээнд ЭТТ ХК лицензээ эзэмшээд Хөрөнгө оруулалтын тухай, Биржийн тухай хуулийн дагуу биржийн үнээрээ нүүрсний экспорт борлуулалтыг нэмэгдүүлэхээр ажиллана. ТЭЗҮ-д заагдсанаар 15 сая тоннын хүчин чадалтай Бортээгийн ордыг эдийн засгийн эргэлтэд оруулах тооцооллыг өнөөдөр танилцуулсан. Дараагийн хурлуудад илүү нарийвчилсан тооцоолол хувилбар гаргаж 2026 онд багтааж эдийн засгийн эргэлтэд оруулах, 1 тэрбум ам.долларын нэмэлт орлого олох, хил дамнасан төмөр замын бүтээн байгуулалтын ажил өндөрлөхөд Баруун, Зүүн цанхиас гарах 30 сая тонн дээр 15 сая тонныг нэмэлтээр экспортлохоор бэлдэж байгаа" гэлээ.